Albert Raý Qazaqstandaǵy kýrorttar Túrkııaǵa qaraǵanda nege qymbat ekenin túsindirdi
ASTANA. QazAqparat - Búgin V Halyqaralyq taý-ken metallýrgııa kongresi aıasyndaǵy baspasóz máslıhatynda QR Indýstrııa jáne jańa tehnologııalar birinshi vıtse-mınıstri Albert Raý Túrkııadaǵy kýrorttarda qonaq úıler nelikten Qazaqstanǵa qaraǵanda arzandaý ekenin túsindirip berdi.
«Aqmola oblysynyń burynǵy ákimi retinde aıtatyn bolsam, Býrabaıda qonaq úı nómirin jylyna kem degende 200 kún paıdalaný kerek. Bul kez kelgen kýrorttyń maqsaty. Al Túrkııada olarda onyń deńgeıi jylyna 250 kúnge jetedi. Eger 250 kúnge jetkizilse, ınvestıtsııa quıylady, bári de soǵan baǵyttalady»,- dep túsindirdi vıtse-mınıstr.
Osy oraıda tıisti jospar tyńǵylyqty jasalǵanyn jáne osy baǵyttaǵy jumystar júrip jatqandyǵyn atap ótti. «Birinshi kezekte bizdegi qonaq úı ıeleri qyzmet kórsetý deńgeıin joǵarylatyp, ondaǵy qabyldaıtyn bólmeler jylyna 200 kún boıy suranysta bolýy baǵytynda jumys isteýi tıis. Bul úlken eńbekti qajet etedi. Al tek jaz aılarynda jáne qysta birshama tabys jasap, jyl boıy sonymen ómir súrýge bolmaıdy. Atap aıtqanda, qonaq úı bólmeleri jylyna 200 kún suranysqa ıe bolsa, soǵan sáıkes, demalys oryndaryndaǵy baǵa da qaltany qaqpaıdy»,-dedi A. Raý.
