Albert Raý: Elbasynyń kitaby - Táýelsizdigimizdiń entsıklopedııasy

ASTANA. QazAqparat - QR Prezıdenti Nursultan Nazarbaevtyń «Táýelsizdik dáýiri» kitaby egemendigimizdiń entsıklopedııasy. Mundaı   pikirdi búgin Elbasynyń atalǵan kitabyn talqylaýǵa arnalǵan Qazaqstan halqy Assambleıasy ǵylymı-sarapshylyq keńesiniń otyrysynda Májilis depýtaty Albert Raý bildirdi, dep habarlaıdy QazAqparat.

«Bul eńbekti Táýelsizdik entsıklopedııasy dep atar edim. Óıtkeni, onda barlyq sala, retrospektıvanyń barlyq qyry qamtylǵan. Biz qazirgi jaı-kúıimizge nazar aýdarǵanda eń aldymen munyń barlyǵy qandaı qıyndyqtarmen kelgenin túsingenimiz jón», - dedi ol.

Sonymen qatar depýtat kitaptaǵy árbir joldyń astarynda úlken eńbek jatqanyn basa aıtty.

«Prezıdent 1993 jyly baılanystardyń úzilýi saldarynan 30 qazaqstandyq kásiporyn óndirisin toqtatyp, 114 myń adam jumyssyz qaldy dep jazǵan kezde bul qurǵaq joldar bolyp kórinedi. Al biraq onyń astarynda bútin bir transformatsııa jatyr. Sebebi bir jaǵynan uzaq jyldar basshylyq jasaǵan, ıaǵnı sońǵy túımege deıin qaıda baratyndyǵyn eseptep berip otyrǵan Máskeýmen shynymen de baılanys úzildi. Munyń barlyǵy da múldem ajyrap qaldy. Halyqaralyq sarapshylar Prezıdentimizdiń sol kezdegi is-áreketin daǵdarysqa qarsy menedjerdiń is-qımyly dep naqty baǵa berdi», - dedi Albert Raý.