«AlBarakat Kompanı» basshysyna qatysty taǵy bir istiń tergeýi aıaqtaldy
Bul týraly QR Qarjy mınıstrligi Memlekettik kirister komıtetinen málim etti, dep habarlaıdy QazAqparat.
«Astana qalasy boıynsha Memlekettik kirister departamentiniń Ekonomıkalyq tergeýler qyzmeti «AlBarakat Kompanı» qurylys kompanııasynyń basshysy Baqytjan Toıymbetovke qatysty jeke tulǵalardyń aqshalaı qarajatyn asa iri kólemde urlaý faktisi boıynsha qosymsha epızodtarǵa oraı qylmystyq istiń tergeýin aıaqtady. Ol «AlBarakat Kompanı», «Selıger-K», «Kosshe-Kopa», «Shanyrak Stroı KZ», «AsSem» jáne «Kaz AVTO development» JShS-terin qurý jáne jeke tulǵalardyń aqshalaı qarajatyn «Shardja», «Praga», «Tengız», «Tokıo», «AkJar», «Týran Astana» (Astana), «Quryltaı», «Jaılaý», «Apple town» (JK «Alma Village»)» (Aqmola oblysynyń Tselınograd aýdany) turǵyn úı keshenderin salýǵa tartý arqyly 800-den astam jeke tulǵanyń 1 mlrd. 89 mln. teńgesin urlady dep aıyptalýda», - delingen habarlamada.
Vedomstvo aqparatyna sáıkes, aǵymdaǵy jylǵy 21 qarashada Toıymbetovke qatysty qosymsha epızodtar boıynsha aıyptaý aktisi Astana qalasy prokýratýrasyna bekitý jáne sotqa berý úshin jiberilgen. Aǵymdaǵy jylǵy 2 jeltoqsanda Astana qalasynyń prokýratýrasy aıyptaý aktisin bekitip, Toıymbetovty sotqa berdi.
Esterińizge salsaq, Toıymbetov 2016 jylǵy 17 shildede osyndaı qylmystar jasaǵany úshin 8 jylǵa bas bostandyǵynan aıyrýǵa sottalǵan bolatyn. Toıymbetov pen onymen baılanysty tulǵalardyń 800 mln. teńgeni quraıtyn múlkine tyıym salyndy.
Oǵan qosa, tergeý barysynda fırmanyń shtatynda rásimdelmese de, qurylysty basqarǵan Alıbek Kabýlov esimdi tulǵa anyqtaldy. Jedel-izdestirý sharalarynyń nátıjesinde onyń Ózbekstan Respýblıkasynyń kúshtik qurylymdarynyń burynǵy qyzmetkeri Oıbek Kobılov ekendigi anyqtaldy. Ol 2005 jyldan bastap aýyr qylmys jasaǵany úshin atalǵan memlekette izdeýge jarııalanǵan. Tergeý amaldarynyń nátıjesinde O.Kobılov Ózbekstanǵa ekstradıtsııalandy.
