«Ál-Baǵdadı ıt ólimmen óldi»: Donald Tramp DAISh kóseminiń kózi joıylǵanyn málimdedi

VAShINGTON. QazAqparat — DAISh lańkestik uıymynyń kósemi Ábý Bakr ál-Baǵdadı Sırııada amerıkanyń áskerıleri júrgizgen operatsııa kezinde kóz jumdy. Bul týraly AQSh Prezıdenti Donald Tramp málim etti, dep habarlaıdy QazAqparat «Voice of America» agenttigine silteme jasap.

«Ótken túni Qurama Shtattar álemdegi nómiri birinshi lańkestik uıym kósemin ádil jazaǵa tartty. Operatsııa kezinde birde-bir amerıkalyq áskerı japa shekken joq», - dep málimdedi Tramp.

Sondaı-aq, AQSh basshysy ál-Baǵdadıdiń kóptegen jaýyngeri óltirilgenin atap ótken.

Tramptyń málimdeýinshe, DAISh basshysy «ókirip-baqyryp» jerasty jolymen qashqan. Osylaısha ol belindegi jarylǵysh zatty iske qosyp, úsh balanyń ómirin jalmaı ketken.

Prezıdent onyń ıt ólimmen ólgenin tilge tıek etti.

Tramp Baǵdadıge qarsy operatsııanyń óte sátti ótkenin aıtady. Óz áskerıleriniń kásibı sheberligi men batyldyǵyna rızashylyǵyn bildire kele ol osy operatsııaǵa qol ushyn bergen Túrkııa, Reseı jáne Irak elderine alǵys aıtty.