Ál-Azhar sheıhy ózine syılanǵan shveıtsarlyq saǵatty memlekettik qazynaǵa tapsyrdy
ASTANA. 20 maýsym. QazAqparat - Ál-Azhar sheıhy Ahmet át-Taıyp ózine tartý etilgen shveıtsarlyq «Roıal» saǵatyn Mysyr qarjy mınıstrligine tapsyrdy. Bul jaıynda «ál-Arabııaǵa» silteme jasap, muslim.kz jazady.
Saıttyń jazýynsha, Sheıh bul qadamyn quny 100 dollardan asatyn tartý-taralǵylardy el qazynasyna ótkizý týraly úkimet múshelerine qatysty ókimdi oryndaǵandyqtan bardym dep túsindirdi. Ol atalmysh jarlyqtyń din qaıratkerlerine qatysy bolmasa da ózgelerge úlgi kórsetý maqsatynda osyndaı áreketke barǵanyn tilge tıek etti.
Qarjy mınıstri Faıad Ábdimoneımanyń sózine qaraǵanda, maýsym aıynyń 26-y kúni ótetin bássaýdaǵa joǵary laýazymdy sheneýnikterden alynǵan asa baǵaly 13 syılyq shyǵarylady. Odan túsken qarjy memleket qazynasyn tolyqtyratyn bolady.
Mundaı bássaýdanyń Mysyrda alǵash ret ótkiziletinin aıta ketý kerek.
