Ál-aýqatty tekserý: Endi járdemaqy úshin ajyrasý kómektespeıdi
ASTANA. KAZINFORM — Elimizde memlekettik áleýmettik kómek taǵaıyndaý kezinde jeke adamnyń ǵana emes, tutas úı sharýashylyǵynyń materıaldyq jaǵdaıy eskeriledi. Baǵalaý kezinde bólek turatyn ata-analar da balanyń otbasy quramyna engiziledi. Osylaısha járdemaqy úshin ajyrasýdyń aldyn alý kózdelgen.
Eńbek jáne halyqty áleýmettik qorǵaý mınıstri Asqarbek Ertaevtyń aıtýynsha, 30 qyrkúıekte bekitilgen Áleýmettik ál-aýqat deńgeıin aıqyndaýdyń jańa ádistemesi bekitilgen. Jańa ádistemede eki negizgi komponent — materıaldyq ál-aýqat jáne áleýmettik turaqtylyq qaralady.
— Birinshisi — materıaldyq ál-aýqat. Ol alty baǵyt boıynsha 59 kórsetkishti qamtıdy. Olardyń qatarynda kiris jáne jumyspen qamtý, jyljymaıtyn múlik, kólik, bıznes, aýyl sharýashylyǵy aktıvteri jáne kredıtter esepteledi, — dedi A. Ertaev Ortalyq kommýnıkatsııalar qyzmetinde ótken baspasóz máslıhatynda.
Málimetter memlekettik bazadan alynady. Azamattardan qosymsha anyqtama talap etilmeıdi.
Baǵalaý barlyq otbasy úshin biryńǵaı krıterııler boıynsha avtomatty túrde júrgiziledi.
— Ekinshi komponent — otbasynyń áleýmettik turaqtylyǵy. Otbasynyń quramy, onyń ishinde balalardyń, qart adamdardyń jáne múgedektigi bar adamdardyń bolýy eskeriledi. Asyraýyndaǵy adamdardyń júktemesi barynsha joǵary bolsa, otbasynyń áleýmettik turaqtylyǵy tómen bolady, — deıdi Eńbek mınıstri.
Osylaısha, tabystyń birdeı bolýy ál-aýqat deńgeıiniń birdeı ekenin bildirmeıdi. Áleýmettik júktemesi joǵary otbasylarǵa tıisti baǵa beriledi.
Bir mekenjaı boıynsha tirkelgen otbasy músheleri, týystary jáne birge turatyn basqa adamdar esepke alynady. Olardyń tabysy men múlki eskeriledi.
— Jalǵyz turatyn ata-analar bólek turǵan jaǵdaıda da balalarynyń otbasy quramyna engiziledi, — dedi Asqarbek Ertaev.
Buǵan deıin A. Ertaev birde-bir muqtaj qazaqstandyq qoldaýsyz qalmaıtynyn aıtqan edi.
Quryltaı depýtaty Lázzat Qojahmet jumys isteıtin áıelderdiń dekrettik tólemi saqtalatynyn aıtqan edi.
