Ál-aýqatty baǵalaý kalkýlıatory qalaı jumys isteıdi
ASTANA. KAZINFORM — QR Eńbek jáne halyqty áleýmettik qorǵaý mınıstrligi azamattarǵa «Ál-aýqatty baǵalaý kalkýlıatory» tsıfrlyq servısiniń jumys tártibin eske saldy.
Bul qural tek áleýmettik járdemaqy alýshylarǵa óz otbasynyń materıaldyq jaǵdaıyn aldyn ala baǵalaýǵa múmkindik beredi.
Azamattarǵa yńǵaıly bolý úshin servıs barynsha ońaılandyrylyp, úsh kezeńge bólingen.
Birinshi qadam – otbasy
Derekterdi engizý ózińizden bastalady.
Avtorızatsııadan ótý úshin JSN-ińizdi engizesiz. Osydan keıin júıe memlekettik derekqorlardan siz týraly ózge málimetterdi avtomatty túrde alady. Atap aıtqanda: jynysyńyz, jasyńyz, múgedektigińizdiń nemese sozylmaly aýrýlaryńyzdyń bolýy, resmı túrde jumysqa ornalasýyńyz ben kredıtterińiz týraly málimetter.
Sizge tek osy derekterdiń ózektiligin tekserý kerek. Kez kelgen málimetti ózektendirip, qajet bolǵan jaǵaıda túzetýge bolady.
Budan keıin ózińizben bir mekenjaıda turatyn, sol jerde tirkelgen jáne ortaq sharýashylyq júrgizetin otbasynyń árbir múshesi týraly dál osyndaı málimetterdi ózińiz engizesiz.
Ekinshi qadam – aktıvter men kirister
Bul kezeńde de derekterdi engizý tártibi osyndaı.
Ózińizge tıesili múlik týraly aqparat júıege avtomatty túrde júkteledi. Qajet bolǵan jaǵdaıda ony tolyqtyrýǵa nemese túzetýge bolady.
Atap aıtqanda, sizdiń atyńyzda tirkelgen jeńil avtokólikter, kommertsııalyq kólik, aýyl sharýashylyǵy tehnıkasy, jyljymaıtyn múlik, turǵyn úı, jer ýchaskeleri jáne bıznestegi úlester týraly málimetter qamtylady.
Odan keıin sizben birge turatyn otbasy múshelerine tıesili osyndaı aktıvter týraly aqparatty kezekpen engizesiz.
Sondaı-aq otbasynyń árbir múshesiniń ortasha aılyq tabysy kórsetiledi.
Úshinshi qadam – aldyn ala baǵalaý nátıjesi
Bul – protsestiń úshinshi kezeńi.
Tekserilgen jáne ózińiz engizgen barlyq derekter negizinde otbasyńyzdyń ál-aýqat deńgeıi týraly aldyn ala nátıje birden kórsetiledi.
Nátıjeden keıin ekranda shaǵyn saýalnama paıda bolady. Onda azamattar servıs jumysyna bes baldyq shkala boıynsha baǵa bere alady nemese óz pikirin erkin túrde qaldyra alady.
Azamattardyń pikiri biz úshin óte mańyzdy. Ol kalkýlıatordyń dáldigin arttyryp, ony paıdalanýshylar úshin barynsha yńǵaıly etýge múmkindik beredi.
Kalkýlıator tek aldyn ala baǵalaýǵa arnalǵan jáne anyqtamalyq sıpatqa ıe.
Esepteý nátıjesi, onymen kelisý nemese kelispeý, servıske berilgen baǵa nemese qaldyrylǵan pikir áleýmettik járdemaqylardy taǵaıyndaýǵa, olardyń mólsherine nemese tólenýin jalǵastyrýǵa eshqandaı áser etpeıdi.
Bul járdemaqydan bas tartý týraly ótinish bolyp sanalmaıdy jáne tólemderdi toqtatýǵa nemese ýaqytsha toqtata turýǵa negiz bola almaıdy.
Esepteý nátıjesi engizilgen derekterdiń tolyqtyǵyna tikeleı baılanysty. Sebebi árbir kórsetkish qorytyndy baǵaǵa áser etedi.
Eger otbasy músheleriniń biri júıege engizilmese nemese onyń tabysy men múlki týraly málimetter kórsetilmese, esepteý nátıjesi dál bolmaıdy jáne otbasynyń naqty jaǵdaıyn tolyq kórsetpeıdi.
Sondyqtan esepteýdi aıaqtamas buryn otbasynyń barlyq múshesi júıege engizilgenin jáne málimetterdiń tolyq kórsetilgenin muqııat tekserý usynylady.
Múlik týraly málimetterden qate anyqtalǵan jaǵdaıda ne isteý kerek?
Eger ózińizge tıesili múlik týraly málimetterde qate málimet baıqasańyz, ony resmı tártippen túzetýge bolady.
Ol úshin eGov.kz portalynyń jeke kabıneti nemese eGov Mobile mobıldi qosymshasy arqyly ýákiletti organdarǵa ótinish berýge bolady. Sondaı-aq turǵylyqty jerińiz boıynsha Qazaqstan Respýblıkasy Eńbek jáne halyqty áleýmettik qorǵaý mınıstrliginiń Áleýmettik qorǵaý salasyn retteý jáne baqylaý komıtetiniń aýmaqtyq departamentine júginýge bolady.
QR Eńbek jáne halyqty áleýmettik qorǵaý mınıstrligi azamattardy tek mınıstrliktiń resmı resýrstaryn paıdalanýǵa shaqyrady.
Mınıstrliktiń ál-aýqatty baǵalaý kalkýlıatory tek eGov.kz portalynda jáne eGov Mobile resmı mobıldi qosymshasynda qoljetimdi.
Messendjerlerde, áleýmettik jelilerde, bógde saıttarda ornalastyrylǵan nemese SMS-habarlamalar arqyly jiberiletin siltemeler boıynsha qoljetimdi kalkýlıatorlar – jalǵan servıster.
Buǵan deıin Otbasynyń tsıfrlyq kartasynyń (OTsK) jumys isteý qaǵıdattary týraly jazǵan edik.