Aqjúrek Tańatarov: Sporttan ketýdi oılap júrmin
- Aqjúrek Dostyquly, «Qazaqstannyń 100 jańa esimi» jobasynda jeńimpaz atanýyńyzben quttyqtaımyn. Aıtýly sharanyń (Prezıdentpen kezdesý) aldyndaǵy kóńil-kúıińiz qalaı?
- Bul joba bastalǵan kezde elde bolmap edim. Maǵan telefon arqyly habarlasyp, «Qazaqstannyń 100 jańa esimi» jobasyna úmitker retinde tirkedik dep habar berdi. Týys-týǵandarymyz, tanys sportshylarymyz, Jambyl oblysy bolyp bári de daýys bergen eken. Qońyraý shalyp, daýys berip jatyrmyz dep aıtyp jatqandar da boldy. Kópshiliktiń qoldaýymen «Qazaqstannyń 100 jańa esimine» endim.
- Aldaǵy josparlaryńyz qandaı? Birneshe halyqaralyq jáne álemdik dárejedegi chempıonattarǵa qatysyp, júlde alyp kelip kelgenińizdi estip jatyrmyz...
- Álem birinshiligine deıin alty iri jarysqa qatystym. Ádette, sportshylar alty jarysty bir jylda ótkizedi. Al maǵan bul syndy alty aıda ótýge týra keldi. Sol sebepten, bıylǵy jyldy demalyspen aıaqtaımyn. Demalys degenge árıne, aıaqty kóterip qoıyp, úıde tynyǵyp jatý degendi bildirmeıdi. Kúnine bir mezgil jattyǵý jasaımyn. Artymda erip kele jatqan inilerim bar. Solardy baptap júrmiz.
- Tokıo Olımpıadasy da jaqyndap kele jatyr. Endi bir Olımpıadanyń shyńyn baǵyndyrý josparyńyzda joq pa?
- Tokıo Olımpıadasyna jete alamyn dep aıta almaımyn. Onyń ózindik naqty sebepteri bar. Bir shetinen jasym da kelip qaldy. Ekinshiden, qazirgi ýaqytta kúres erejeleri ózgerip barady. Máselen, iri jarystarda tańerteń salmaq ólsheý rásimi ótedi de, saǵat 09:30-10:00 shamasynda jarys bastalyp ketedi. Túske deıin bes márte boz kilemge shyǵyp, jolyń bolsa fınalǵa deıin shyǵasyń. Erteńinde taǵy salmaq ólshep, fınalda kúresemiz. Jasy kelgen adamdar úshin bul óte qıyn.
Taǵy bir kedergi - meniń salmaǵym endi Olımpıada oıyndaryna kirmeıdi. Naqtyraq aıtqanda, 10 salmaqtyń budan bylaı altaýy ǵana Olımpıada oıyndaryna enedi. Tórteýi Olımpıadalyq salmaq dárejeleri sanalmaıdy. Buryn grek-rım kúresinde 7, erkin kúres sheberlerinde 7 salmaq jazǵy Olımpıada oıyndarynyń erejelerinde bolǵan. Eki sport túrinen bir-bir salmaqty alyp tastap, qyzdarǵa Olımpıadaǵa qatysýǵa múmkindik ashyldy. Názik jandylarǵa Olımpıadaǵa qatysýǵa múmkindik paıda boldy degenimizben, erejedegi bul ózgeris bizdiń salmaqtaǵy balýandardyń jolyn bógedi. Qazir balýandardyń birazy MMA sportyna ketip jatyr. Qalǵan tórt salmaqta Álem birinshiliginde shyǵýǵa bolady. Al Olımpıada men Álem birinshiligin salystyrýǵa álbette kelmeıdi.
- Demek, sporttan ketýdi oılap júrsiz be?
- Iá, sporttan ketýdi oılap júrmin. Sátin salsa, kelesi jyly sporttan ketetinim týraly resmı túrde habarlaımyn.
- Erkin kúrestegi mansabyńyzdy aıaqtaıtynyńyzdy aıtqanyńyzben, jalpy sporttan qol úzbeıtin bolarsyz?
- Álbette! Sport ınternatynan ózimiz iriktep alǵan alty balanyń tórteýi jaqynda úzdik óner kórsetip, bireýi Qazaqstan birinshiliginde top jardy. Al úsheýi júldege ıe boldy. Bul - tórt aıdyń nátıjesi. Men úshin bul óte úlken dáreje, zor qýanysh desem de bolady. Nege deseńizder, 20 jyl jattyǵý jasatyp, Qazaqstan birinshiliginde shákirtteri júldege ilinbeı júrgen jattyqtyrýshylar bar. Al 4 aıda Qazaqstan chempıony ataǵyn alǵan shákirtti tárbıelegenimizge shúkir deımin.
- Artyńyzdan ergen jas býyn balýandarǵa ne tileısiz?
- Jas býyn balýandarǵa tileıtinim, birinshiden jeńimpaz bolý úshin elińdi, jerińdi, kók baıraǵyńdy súıip, patrıot bolý kerek dep oılaımyn. Patrıot bolsańyz, bıik tuǵyrdan kórinesiń. Ekinshiden, eńbek etý kerek. Eńbek barda jeńis te bar. Sportta qıyn jaǵdaılar bolyp jatady. Ár jamandyqtyń artynda bir jaqsylyq jatady deıdi ǵoı. Sol sebepten kúrdeli kezeńderde ózi-ózińdi syndyrmaı, eńbek etseń, jeńiske jetý, Olımpıada shyńyn baǵyndyrý qolyńnan keler dep oılaımyn.
- Suhbatyńyzǵa rahmet!
- Sizge de rahmet!
