«Aqjoldyqtar» esirtkige táýeldilikti «Metadonmen» emdeýge qarsy
ASTANA. QazAqparat - QR Parlamenti Májilisindegi «Aq jol» fraktsııasynyń depýtattary esirtkige táýeldilikten emdeý úshin «Metadon» paıdalanýǵa qarsy. Bul jaıynda búgin Májilis depýtaty Merýert Qazbekovanyń elimizdiń Premer-Mınıstri Baqytjan Saǵyntaevtyń atyna joldaǵan depýtattyq saýalynda aıtylǵan.
«Aq jol» fraktsııasy Qazaqstanda «Metadon» sıntetıkalyq esirtkisin zańsyz ilgeriletý máselesin taǵy da kóteredi. Máselen, apıyndy almastyratyn terapııa ilki jobasy aıasynda atalǵan preparat elimizge 9 jyl boıy esirtkige táýeldilikti emdeý úshin ákelinýde. «Metadon» Reseıde tyıym salynǵan, Ózbekstan ilki jobany toqtatyp, qalǵan dárini gýmanıtarlyq kómek retinde bizdiń elimizge berdi. Qyrǵyzstan depýtattary atalǵan esirtkini shyǵaratyn zaýyt qurylysyna qoldaý bildirgen joq. Qazaqstanda «Metadondy» zertteý jáne klınıkalyq synaqtan ótkizý zańnamada qarastyrylǵan talaptardy buza otyryp júrgizildi», - dedi Májilis depýtaty.
Onyń aıtýynsha, 2011 jyly táýelsiz komıssııa ilki jobanyń nátıjesi boıynsha Densaýlyq saqtaý mınıstrligine teris qorytyndy bergen. Alaıda belgisiz sebeptermen atalǵan tekseris nátıjesi aıtylmaı otyr.
Sonymen qatar Merýert Qazbekova «Aq jol» partııasyna elimizdiń medıtsınalyq qoǵamdastyǵy tarapynan «Metadondy» qoldanýǵa baılanysty alańdaýshylyq tanytqan hattardyń kóptep túsip jatqanyn basa aıtty.
