«Aqjoldyq» depýtat eldiń halyq qalaýlylaryna senimin baǵalaýdyń jolyn aıtty
ASTANA. QazAqparat - Májilis depýtaty Azat Perýashev el turǵyndarynyń qazirgi halyq qalaýlylaryna senimin baǵalaýdyń jolyn aıtty, dep habarlaıdy QazAqparat.
«Men Parlamenttiń múshesimen. Sondyqtan meniń pikirim qalaı bolǵanda da sýbektıvti. Halyqtyń senim deńgeıin halyq aıqyndaıdy. Sońǵy parlamenttik saılaýǵa qansha adam keldi? Ol kezde saılaýǵa qatysý deńgeıi qandaı boldy? Mine, osydan aıqyndaý qajet», - dedi ol jýrnalısterdiń atalǵan máselege qatysty saýalyna oraı.
Sonymen qatar ol ózi synaıtyn memlekettik qyzmetshilermen aradaǵy qarym-qatynasy jaıynda da aıtyp berdi.
«Parlamentke kelgen soń biz ózimizge júktelgen mindetti oryndaımyz. Jasaýymyz qajetti dúnıeler bar. Memlekettik qyzmetshilermen qatań daýlasyp, pikirtalastyryp qalatyn jaıttar jıi bolady. Al olarmen meniń jeke qarym-qatynasym jaqsy. Biraq, qyzmet paryzyma oraı, depýtat retinde yńǵaısyz jáne keı-kezde jaýap bergiń kelmeıtin saýaldar qoıamyn. Muny jasaı da beremiz. Ony bizdiń partııamyz úshin daýys bergen adamdar aldyndaǵy mindetim dep sanaımyn»,- dedi Perýashev.
Aıta keteıik, keshe QR Prezıdenti Nursultan Nazarbaev otandyq telearnalar arqyly bılik tarmaqtary arasynda ókilettikterdi bólý máseleleri jónindegi úndeýin jarııa etti. Onda Prezıdenttiń áleýmettik-ekonomıkalyq protsesterdi retteýdegi birshama ókiletterin Úkimetke jáne basqa da atqarýshy organdarǵa berý, Úkimetti jasaqtaýda Parlamenttiń rólin kúsheıtý qarastyrylǵan.
