«Aqjol» partııasynyń aqtóbelik delegaty saılandy
Aqtóbede «Aqjol» demokratııalyq partııasy kezekten tys XV Sezine delegat saılaý úshin búgin jıyn ótkizdi. Jıynǵa QR Parlament Májilsiniń depýtaty Danııa Espaeva men partııanyń oblystyq fılıal tóraǵasy Asqar Sadyqov qatysty.
«Aqjol» partııasy Nur - Sultan qalasynda ortalyq keńestiń plenýmyn ótkizdi. Plenýmǵa fılıal tóraǵalary men ortalyq komıtettiń músheleri qatysty. Maqsat - «Aqjol» partııasynyń prezıdenttik saılaýǵa qatysýy men prezıdenttikke úmitkerdi anyqtaý. Partııa alǵash ret prezıdenttik saılaýda kandıdat usynady. Al Sezd 24-sáýir kúni ótedi. Negizi Nur - Sultan qalasyndaǵy plenýmda tek prezıdenttikke úmitker anyqtalmady. 2 saǵattan astam ýaqyt pikirtalas bolyp, bir sheshimge kelmedi. Kóbi Azat Perýashevtiń kandıdatýrasyn usyndy. Degenmen A.Perýashevtiń ózi ózge de adamdardyń úmitker bola alatynyn aıtty. Soltústik Qazaqstan, Jambyl oblystarynyń fılıal tóraǵalary ózderin usyndy. Sol jıynda 7-8 usynys túsken eken. Naqty sheshim Sezde qabyldanatyn boldy», - dedi QR Májilis depýtaty Danııa Espaeva.
Onyń aıtýynsha, demokratııalyq partııa áıel adamnyń prezıdenttikke úmitker bolýy múmkin degen nusqany da qarastyryp jatyr.
«Naqty kim ekenin aıtý qıyn. Tek prezıdenttikke úmitker bolatyn kandıdattar bar, naqty sheshimi kelesi aptada belgili bolady. Sol kúnge deıin barlyq óńirde jıyn bolyp, delegattar saılanady», - dedi D.Espaeva.
Aıta keteıik, Nur - Sultan qalasyndaǵy aýa raıynyń qolaısyzdyǵynan partııa tóraǵasy Azat Perýashev Aqtóbedegi konferentsııaǵa qatysa almady. Al konferentsııa kezinde 24-sáýirdegi Sezge 6 delegat saılandy.
