«Aqjol» partııasy jańa Konstıtýtsııa jobasyna 50-den astam túzetý usyndy

ASTANA. KAZINFORM – Jańa Konstıtýtsııa jobasyn ázirleý boıynsha ótken jyldyń qyrkúıeginen beri júrgizilgen jartyjyldyq jumys aıasynda «Aq jol» demokratııalyq partııasy parlamenttik reformaǵa jáne Konstıtýtsııanyń ózge de bólimderine qatysty 50-den astam túzetý usynǵan.

Bul týraly Konstıtýtsııalyq reformalar jónindegi komıssııanyń XII otyrysynda Májilis depýtaty Azat Perýashev málimdedi.

Depýtat «Aq jol» demokratııalyq partııasy kótergen birqatar usynystyń jobaǵa engizilgeni úshin komıssııa múshelerine alǵys bildirdi.

– «Aq jol» demokratııalyq partııasy kótergen birqatar usynys jobaǵa engizilgeni úshin komıssııa múshelerine alǵysymdy bildiremin. Atap aıtqanda, bıznes quqyqtaryn qorǵaý, menshik nysandarynyń ártúrliligi men olardy qorǵaý kepildikterin bekitý, bank jáne kommertsııalyq qupııa máseleleri eskerildi. Jańa Konstıtýtsııadaǵy basqa da mańyzdy jańashyldyqtarmen birge bul normalar kásipkerlerdiń zańdy quqyqtaryn ilgeriletýge, qolaıly ınvestıtsııalyq ahýal qalyptastyrýǵa jáne jeke bıznesti damytýǵa oń áser etedi dep senemin, – dedi Azat Perýashev.

Sonymen qatar ol «Aq jol» partııasy ulttyq múddeni qorǵaý máselesin kóp jyldan beri kóterip kele jatqanyn atap ótti.

– Konstıtýtsııa preambýlasynyń qaıta qaralyp, Qazaqstannyń qazirgi memlekettik qurylymy onyń myńjyldyq tarıhı tamyrlarymen sabaqtastyrylýyn erekshe quptaımyz. Jedel damýshy qalalarǵa erekshe mártebe berý múmkindigin mańyzdy dep sanaımyn. Bul elimizge ınvestıtsııalarmen qatar, jańa ónimder, taýarlar men qyzmet túrleriniń paıda bolýyna ilese bermeıtin retteý tetikterin jetildirý arqyly ozyq tehnologııalardy tartýǵa jol ashady, – dedi ol.

Buǵan deıin «Aq jol» partııasy Konstıtýtsııalyq reformaǵa qatysty málimdeme jasaǵan edi.