Aqjelkektiń adam densaýlyǵyna paıdasy qandaı – maman pikiri
NUR-SULTAN. QazAqparat – El ishinde emge dárý ekeni jıi aıtylyp júrgen aqjelkektiń (hren) adam densaýlyǵyna paıdasy qandaı? Bul suraqqa «Antikor Live» jobasynda bergen suhbatynda Qazaq taǵamtaný akademııasynyń prezıdenti, medıtsına ǵylymdarynyń doktory Tóregeldi Sharmanov jaýap berdi, dep habarlaıdy QazAqparat tilshisi.
«Aqjelkek bolsyn, sarymsaq bolsyn – adam densaýlyǵyna paıdasy zor eken degen áńgime jıi aıtylyp júr ǵoı. Alaıda árbir aýrý boıynsha kez kelgen dári shóp nemese dári bolsyn 100 paıyz paıda beredi degen áńgime joq. Statıstıka boıynsha eń asyp ketkende – 95-96 paıyz. Ar jaǵynda 4-5 paıyz qalyp qoıady báribir. Al sol 4-5 paıyzdyq emdi beretin dáriler men shıpa – halyq emshiligi. Sol sekildi 100 adamnyń ishinde 4-5 adamnyń aǵzasyna ol jaqsy áser etýi múmkin. Paıdasy tıetin adamdar bar», - deıdi Tóregeldi Sharmanov.
Onyń aıtýynsha el ishinde aýyzdan-aýyzǵa taraǵan áńgimeden keıin kókónistiń keıbir túrine suranys surapyl bolyp ketedi.
«Keıde emdeýdiń 90 paıyzdyq tıimdiligi dalada qalady da, kórshiniń paıdalanǵan emi sizge de em bolyp qonýy múmkin. Bul jerde adamnyń kóńil-kúıine de kóp nárse baılanysty. Palataǵa kirip keletin dárigerdiń bet-júzi, kózqarasyna qarap naýqastyń aýrýy jeńildep ketýi yqtımal. Ol – psıhologııa. Sondyqtan adamnyń aldymen emdelip ketetini boıynsha senimi bolýy kerek. Dári báribir 100 paıyz jazylyp ketetinińizge jaýap bermeıdi», - dedi ol.
Eske sala ketsek buǵan deıin Tóregeldi Sharmanov indet órshigen qazirgi jaǵdaıda qandaı taǵam men sýsyn túrleri paıdaly ekenin aıtyp bergen bolatyn. Onyń aıtýynsha qazirgi indet órshigen jaǵdaıda ár adam úıdegi jas úlken kisilerdiń jaıyn oılaýy kerek.
