«Aqjaıyqtyń aqkerbezi» atty respýblıkalyq termeshiler baıqaýy márege jetti
NUR-SULTAN. QazAqparat - Shyńǵyrlaý aýdanynda belgili ánshi-termeshi, Qazaqstannyń eńbek sińirgen ártisi Qalampyr Rahımovanyń shyǵarmashylyǵyna arnalǵan І dástúrli respýblıkalyq termeshiler baıqaýy márege jetti, dep habarlaıdy QazAqparat tilshisi.
Alǵash ret uıymdastyrylǵan óner dodasyna Aqtóbe, Mańǵystaý, Qostanaı, Qyzylorda jáne Batys Qazaqstan oblysynan barlyǵy 12 úmitker qatysyp, baq synady.
Baıqaý maqsaty - ómirden erte ketken ánshiniń úntaspada jazylǵan án-termelerin keıingi urpaqqa nasıhattaý, jyrshylyq-termeshilik ónerdi keńinen damytý. Sondaı-aq jańa esimderdi ashyp, jas daryndarǵa qoldaý kórsetý.
Saıysqa QR eńbek sińirgen ártisi, Ǵ.Qurmanǵalıev atyndaǵy oblystyq fılarmonııanyń ánshisi Sáýle Taýdaeva bastaǵan qazylar alqasy tórelik etti.
Baıqaý qorytyndysynda oraldyq Nazgúl Qabıeva bas júldeni jeńip aldy.
Terekti aýdanynan kelgen Laýra Muhambetjanova men Nuraıym Ertalapqyzy birinshi, oraldyq Ámına Ǵaınedenova men aqtóbelik Ǵazıza Ábdirova ekinshi orynǵa ıe boldy. Aqtaýlyq Aınur Omarova, oraldyq Aqmaral Kemelhanova, qostanaılyq Aıjan Sanaı úshinshi oryndy bólisti.
Q.Rahımovanyń esimin máńgi este qaldyrý maqsatynda atalmysh baıqaý dástúrli túrde ótip turmaq.
Aıta keteıik, Shyńǵyrlaý aýylyndaǵy ortalyq saıabaqta ánshi músini ornatylǵan.
