Aqjaıyqta «Elim barda táýelsiz, Sarqylmaıdy án-jyrym!» atty aqyndar aıtysy ótti

 
Belgili aıtysker aqyn Saǵyntaı Bısenǵalıev júrgizgen saıysqa aldy respýblıkalyq dodada báıge alyp júrgen barlyǵy 12 úmitker qatysty.

El táýelsizdigin baıandy etý - babalar aldyndaǵy qasıetti boryshymyz, keleshek aldyndaǵy zor jaýapkershiligimiz. Azattyǵymyzdyń shırek ǵasyrynda ǵasyrǵa belgisiz joldyń jondarymen júrip ótip, tolaǵaı tabystarǵa tuıaq iliktirdik. Endi osyny alǵa qaraı aparýda halqymyz jastarǵa zor senim júkteıdi. Mine, osyny sahnadan sońǵy jyldary aıtystaǵy eren tabystarymen jalpaq elge tanyla bastaǵan syrymdyq Baýyrjan Shırmedınuly jaqsy jetkize bildi.

Jańaqalalyq Orynbek Meńdiqulovpen jup bolǵan ol kópshilikti alańdatatyn máselelerdi de tegeýrindi jyrǵa qosty. Mysaly, aqparat tasqyndaǵan zamanda ony saýatty paıdalana bilmeıtinder az emesi málim. Bul jastar tárbıesine oısyraǵan olqylyq ákelýde. Osyny Baýyrjan «...Smartfon sıpaǵandar ilese almaı, qalammen jazylǵandar máńgi qalar» dep, bir qaperge salyp ótti. Sondaı-aq jánibektik Muradym Mırlanov pen aqjaıyqtyq Meıirman Shákenov, Oraldan Talǵat Myqı men Aınabek Bısenǵalıev arasyndaǵy aıtystardyń da eleń etkizer tustary az bolǵan joq.

Qazylar alqasynyń sheshimimen aqyndar arasynan Orynbek Meńdiqulov pen Bekbolat Qalenov jáne Baýyrjan Shırmedınuly men Muradym Mırlanov arasynda sońǵy jekpe-jekter ótkizildi.



Aıtys qorytyndysynda Syrym aýdandyq «Syrym eli» gazetiniń tilshisi Baýyrjan Shırmedınuly jeńimpaz atansa, Muradym Mırlanov ekinshi, Aqjaıyq aýdandyq «Jaıyq tańy» gazetiniń tilshisi Bekbolat Qalenov úshinshi oryndy ıelendi. Olarǵa óńirdegi eki oblystyq, 12 aýdandyq gazettiń basyn qosyp otyrǵan «Jaıyq Press» JShS-nyń syılyqtary tabys etildi. Kópshilikti súısintip, bir jelpintip tastaǵan osynaý óner dodasynda Taıpaq mektep-gımnazııasynyń qyzmetkeri Gúlzada Baqytovanyń aıtystaǵy tusaýy kesildi.
«Jaıyq tańy» gazetiniń bas redaktory Bolat Esqalıevtiń aıtýynsha, basylymnyń 60, 70, 75 jáne 80 jyldyqtarynda da osyndaı aıtys uıymdastyrylyp, kóptegen jas aqynǵa úlken sahnaǵa joldama bergen edi. Jaqsy úrdis bıyl da jalǵasyn tapty.

Gazet ujymyn mereıtoıymen aýdan ákimi Ádil Jolamanov, «Jaıyq Press» JShS bas dırektorynyń orynbasary Meırambek Rahmatýllın, respýblıkalyq «Egemen Qazaqstan» gazetiniń BQO-daǵy menshikti tilshisi Temir Qusaıyn jáne basqalar quttyqtap, izgi lebizderin bildirdi.

Aıta keteıik, aýdandyq gazet alǵash 1931 jyly 7 qyrkúıekte «Lenınskıı pýt» degen ataýmen shyqty. Ár jyldary túrlishe ataýmen jaryq kórgen basylym osynaý ýaqyt ishinde san belesten, qıly asýlardan ótti. 1998 jyldan beri «Jaıyq tańy» atalyp, taralymy kóbeıgen gazet shyn mánisinde aýdan aınasyna aınalyp, táýelsizdik jylnamasyn jańa paraqtarmen tolyqtyryp keledi. Qazirgi tańda «Jaıyq tańy» - óńirdegi ózindik bet-beınesi, aıshyqty qoltańbasy bar aldyńǵy qatardaǵy basylymdardyń biri.