Aqjaıyqta belgili kompozıtor Seıitqalı Qaıyrǵalıevtiń ánderi shyrqaldy
ORAL. QazAqparat - Aqjaıyq aýdany ortalyǵy Chapaevta belgili kompozıtor Seıitqalı Qaıyrǵalıevtiń (1946-1992) ánderin oryndaýdan alǵash ret baıqaý ótti, dep habarlaıdy «QazAqparat» tilshisi.
Aýdan ákimi Ádil Jolamanovtyń aıtýynsha, án saıysyn bolashaqta eki jyl saıyn uıymdastyryp, respýblıkalyq deńgeıge jetkizý kózdelýde. Sonymen qatar kompozıtordyń án jınaǵyn shyǵarý da oılastyrylýda.
Baıqaý qorytyndysynda Terekti aýdanynan kelgen Gúlnaz Qusaıynova bas júldeni jeńip aldy. Oraldyq Azamat Amangeldiuly birinshi, Aqjaıyq aýdanynan Mıras Melsuly men tasqalalyq Úmit Ótebalıeva ekinshi, aqjaıyqtyq dýet Altynbek Bazarov pen Mádına Nurseıilova úshinshi orynǵa ıe boldy. Gala-kontsertke batysqazaqstandyq belgili ánshiler Marat Sarbópeev pen Erkin Ótegenov te qatysyp, kompozıtordyń týyndylaryn oryndady.
Sharaǵa qatysqan kompozıtordyń zaıyby Bıkamal Qaıyrǵalıeva uıymdastyrýshylarǵa rızashylyǵyn bildirip, ómirden nebári 47 jasynda ótken jarynyń elýden astam áni baspa júzin kórgenin, jarııalanbaǵan áli de birshama dúnıeleri bar ekendigin jetkizdi.
Aıta keteıik, 1946 jyly qazirgi Aqjaıyq aýdany Qaraýyltóbe aýylynda kindik qany tamǵan Seıitqalı Qaıyrǵalıev Aqtóbe mádenı-aǵartý ýchılışesin bitirgen. Óz aýylyndaǵy mádenıet úıinde eńbek jolyn bastaǵan ol keıin Almaty oblysyndaǵy Esik qalasyndaǵy mádenıet úıinde, oblystyq fılarmonııada qyzmet atqardy. 1979 jyldan ómiriniń sońǵy kúnderine deıin Qazaq teledıdarynda dybys rejısseri bolǵan S.Qaıyrǵalıev Shymkent mádenıet ınstıtýtyn syrttaı támamdady. Onyń, ásirese, «Ketseń de shalǵaı» (óleńin jazǵan Botagóz Baımuqanqyzy), «Mahabbat nazy», «Júrek syry», «Úmitim meniń» (Qudaıbergen Qazybekov), «Eki juldyz» (Tumanbaı Moldaǵalıev) syndy ánderi keńinen taralǵan. 
Kompozıtordyń ul-qyzdary Almaty qalasynda turady.
