Aqjaıyqta aqyn Saǵyntaı Bısenǵalıevtiń shyǵarmashylyq keshi ótti
ORAL. QazAqparat - Aqjaıyq aýdany ortalyǵy Chapaev aýylynda aqyn, Qazaqstan aqyn-jyrshylar odaǵynyń múshesi, respýblıkalyq aıtystardyń júldegeri Saǵyntaı Bısenǵalıevtiń «Dalamnyń tańy - taǵdyrym» atty shyǵarmashylyq keshi ótti, dep habarlaıdy «QazAqparat» tilshisi.
Óleń ólkesinde óz orny bar Saǵyntaı Bısenǵalıevtiń 60 jasqa tolýyna oraı uıymdastyrylǵan keshte aqyn, Qazaqstan Jazýshylar odaǵy oblystyq bólimshesiniń tóraıymy Aqushtap Baqtygereeva, oblystyq mádenıet, muraǵattar jáne qujattama basqarmasynyń basshysy Dáýletkereı Qusaıynov, Aqjaıyq aýdanynyń ákimi Ádil Jolamanov jáne kórshiles aýdandar ókilderi mereıtoı ıesiniń atyna shynaıy lebizderin bildirdi.
Taıpaq topyraǵynda dúnıege kelgen Saǵyntaı Bısenǵalıev qarshadaıynan qara jumystan qashpaı, mańdaı terin sypyra júrip, tynbaı eńbek etti. Respýblıkalyq dodalarda oblys namysyn qorǵap, «Taıpaqtyń qara jorǵasy» atandy. Keıin jazba óleńge den qoıyp, bul saladaǵy eńbegi de jemissiz bolǵan joq. Aldymen «Keshigip kelgen kóktem» atty jınaǵyn shyǵarsa, sodan soń «Jadyrap jetken jazǵa» kezek tıdi. Endi, mine, el ishinde júrip-aq «Kúz de keıde shýaq shashyp turmaı ma, Júregimde jylýy bar taltústiń!», dep ózi jazǵanyndaı, «Kúreń kúz» atty kitabyn alpys jyldyq toıynda kópshiliktiń qolyna ustatty. Alda «qaqaǵan» qystyń turǵanyn eskersek, «qara jorǵanyń» shabysynan jańylmaıtynyn ańǵarýǵa bolady. «At tuıaǵyn taı basar», demekshi, uly Aınabek te búginde aıtysqa qosylyp, tanymal bolyp keledi.
Mereıtoılyq keshte Saǵyntaı Bısenǵalıevtiń ózi jetekshilik etetin «Mýza» shyǵarmashylyq ortalyǵynyń músheleri óner kórsetip, aldy respýblıkalyq aıtystarda júlde alyp júrgen jas aqyndar Jansaıa Mýsına, Muradym Mırlanov, Eldar Ihsanov, Aınabek Bısenǵalıev, Baýyrjan Shırmedınuly sahnaǵa shyǵyp, sóz qaǵystyrdy. 
