Aqjaıyqta aqyn Saǵynǵalı Seıitovtiń músini ashyldy
ORAL. QazAqparat - Búgin Aqjaıyq aýdanynyń ortalyǵy Chapaev aýylynda qazaqtyń kórnekti aqyny, aýdarmashy, synshy, ádebıettanýshy-ǵalym Saǵynǵalı Seıitovtiń 100 jyldyǵyna arnalǵan sharalar barysynda onyń músini ashyldy, dep habarlaıdy «QazAqparat» tilshisi.
Aýdandyq kitaphana alańynda ornatylǵan, jalpy bıiktigi 1,9 metr músinniń avtory - oraldyq Dmıtrıı Baımuqashev. 
«Bar ómirin ádebıetke arnaǵan qalamgerdiń jurt júreginde qalǵandyǵynyń bir dáleli osy. Saǵynǵalıdaı orny erek tulǵany ulyqtaý sharalary Almaty, Astanada ótip jatqanymen, kindik qany tamǵan jerdegi qurmettiń jóni bólek. Bul músin qazaqtyń rýhyna qoıylǵan eskertkish dese de bolady. Sol úshin Aq Jaıyq jurtshylyǵyna rızashylyǵymyzdy bildiremiz», dedi sharaǵa Almatydan arnaıy kelgen aqyn, Qazaqstan Jazýshylar odaǵy basqarmasy tóraǵasynyń birinshi orynbasary Ǵalym Jaılybaı. 
«Ákemiz qaıtyp kelgendeı, erekshe tolqyp turmyn. Rýhanı jańǵyrý, qaıta túleý degen, mine, osy», dedi Dıdar Saǵynǵalıqyzy eskertkish jamylǵysyn aqyn Aqushtap Baqtygereevamen birge ashyp turyp.
Saǵynǵalı Seıitovtiń 100 jyldyǵyna arnalǵan mereıtoılyq sharalarmen «Tsıfrly Qazaqstan: kitaphana damýyna jańa serpin» atty aımaqtyq forým tuspa-tus kelip, oǵan Qazaqstannyń batys óńirinen kitaphanashylar qatysty.
«Kitaphanashylar forýmynyń aqyndar mekeni - Aqjaıyqta ótýi tegin emes. Qylyshynan qan tamǵan totalıtarızmnen qaımyqpaǵan Juban Moldaǵalıev pen syrly da sulý jyrdyń ıesi Saǵynǵalı Seıitovtiń mol murasyn jas urpaqqa jetkizýde oı ordasy, rýhanı otaýlar - kitaphanalardyń alar orny erekshe. Elbasynyń «Bolashaqqa baǵdar: rýhanı jańǵyrý» atty ǵylymı maqalasynda kózdelgen murattarǵa jetý jolynda rýhanı qazynanyń kiltin ustap otyrǵan kitaphanashylarǵa júkteler mindet kóp», dedi aýdan ákimi Ádil Jolamanov.
Jıynda J.Moldaǵalıev atyndaǵy oblystyq ǵylymı-ámbebap kitaphanasynyń dırektory Sholpan Orazaeva, Ǵabdol Slanov atyndaǵy Atyraý oblystyq ǵylymı-ámbebap kitaphanasynyń dırektory Gúljanaı Qalıeva, Saqtaǵan Báıishov atyndaǵy Aqtóbe oblystyq ámbebap kitaphanasynyń dırektory Nesibeli Jumaǵul, tórt oblystan kitaphanalardyń ókilderi S.Seıitov syndy poezııa tarlanbozynyń eńbegin nasıhattaýǵa baılanysty tájirıbelerin ortaǵa saldy. S.Muqanov, J.Saın, Á.Sársenbaev, J.Moldaǵalıev, H.Erǵalıev, Ǵ.Ormanov, basqa da ádebıet alyptarymen ıyqtasa ǵumyr keshken Saǵynǵalı aǵanyń, máselen, Qazaq KSR Ǵylym akademııasynyń Ádebıet sektorynda qarymdy eńbek etken kezinde «Qazaq keńes ádebıeti tarıhynyń ocherkteri» atty ujymdyq qomaqty eńbektiń tórt taraýyn, ózine kórkemsózde ustaz tutqan kórnekti qalam qaıratkerleri - Ǵ.Músirepov pen T.Jarokov týraly synı-ǵumyrnamalyq ocherkter jazyp, Q.Jarmaǵambetovpen birge S.Muqanov shyǵarmashylyǵyn bezbendegeni, «Qyryq jylda» monografııasynyń negizinde ǵylymı dıssertatsııa qorǵaǵany baıandaldy. Forým «HHІ ǵasyr kitaphanasy: pozıtıvtik ózgerister» atty ekskýrsııany tamashalaýmen jalǵasty.
Aýdan ortalyǵyndaǵy Juban Moldaǵalıevtyń eskertkishi janynda mereıtoıǵa arnalǵan saǵatta Juban Moldaǵalıev pen Saǵynǵalı Seıitovtyń arasyndaǵy rýhanı baılanys pen tereń syılastyqtyń talaıǵa úlgi bolatyny aıtyldy. Aýdandyq tarıhı-ólketaný mýzeıinde S.Seıitovtyń tutynǵan zattarynan jasaqtalǵan jeke kabınet ashyldy. Mýzeıde qalamgerdiń jyldar júzinde jaryq kórgen kitaptary, eńbegi úshin alǵan medaldary, qazaq keńes ádebıetin damytýǵa qosqan úlesi úshin alǵan gramotasy, jaqyn jandarymen, maıdanger joldastarymen túsken fotosýretteri, sonymen qatar jeke zattary: dombyrasy, qamshysy, kıgen kıimderi jáne jumys ústeli qoıylǵan.
Aıta keteıik, aqyn Saǵynǵalı Seıitovtiń tyrnaqaldy týyndysy 1936 jyly oblystyq «Ekpindi qurylys» (qazirgi «Oral óńiri») gazetinde jarııalansa, onyń keıin 70 jylǵa jýyq shyǵarmashylyq jolynda elýge tarta kitaby jaryq kórdi.
Aqynnyń mereıtoıy odan ári jalǵasýda.
