«Aqjaıyq» jańa shaǵynaýdanynda qubyr, baǵanalar qoldy bolǵan
ORAL. QazAqparat – Oral qalasyndaǵy «Aqjaıyq» jańa shaǵynaýdanynda qubyr, baǵanalar qoldy bolǵan, dep habarlaıdy QazAqparat tilshisi.
Oral qalasy ákiminiń orynbasary Mıras Múlkáıdiń málim etkenindeı, jańa shaǵynaýdan 2018 jyly salyna bastaǵan bolatyn.
Sodan beri 130 shaqyrymdaı ınjenerlik jeliler tartyldy. Gaz, sýmen qamtý jumystary júrgizildi. Elektr jelilerin tartý aıaqtala keldi.
Bul maqsatqa respýblıkalyq bıýdjetten 4 mlrd jýyq teńge bólingen edi.
Osyndaı jumystar júrgizilip jatqan ýaqytta qurylys-montaj materıaldaryn urlaý faktileri oryn aldy. Mysaly, jaryq shamdary men baǵanalar, sol sekildi káriz qudyqtarynyń qaqpaqtary men jer astyndaǵy turbalar qoldy bolǵan.
Bul derekter boıynsha ishki ister organdaryna ótinish jasalyp, keıbiri anyqtalyp, kúdikti ustaldy.
Qazirgi kezde tergeý amaldary júrgizilýde.
«Merdiger mekeme tarapynan da bárin durystaý, qalpyna keltirý sharalary alyndy», - dedi QazAqparat tilshisine Mıras Múlkáı.
