«Aqjaıyq» sport klýby aýktsıonda satyldy
ORAL. QazAqparat - «Aqjaıyq» sport klýbyn respýblıkalyq jáne oblystyq dopty hokkeı federatsııasy birigip, 11 mln teńgege satyp aldy, dep habarlaıdy «QazAqparat» tilshisi.
«Aqjaıyq» sport klýbynyń dırektory Azamat Shaıhynyń aıtýynsha, onyń bastapqy baǵasy 8 mln 424 myń teńge boldy. «Qalamyzda baı tarıhy bar, 1976 jyly qurylǵan «Aqjaıyq» dopty hokkeı klýbyn saqtap qalý maqsatynda qos federatsııa osyndaı sheshimge keldi. Basqa eshkim almas úshin baǵa 11 mln teńgege deıin kóterildi. «Aqjaıyq» sport klýbynyń bazasynda Isaev kóshesi boıynda ornalasqan ofısimen birge dúken, ájethana, atele jáne qoıma boldy. Osynyń ishinen dúken ǵana jumys jasap tur. Kásipkerler onyń turǵan ornyna qyzyqty. 9 mln, 9,5 mln teńge tikkender boldy, biz solardyń báriniń aldyna túsip kettik. Eger kásipker jeńip alǵan jaǵdaıda dopty hokkeıdiń damýyna kóńil bóler-bólmesi neǵaıbyl edi.
«Aqjaıyq» sport klýby dopty hokkeıden joǵary lıga komandalary arasynda Reseı chempıonatynda burynǵysha oınaı beretin bolady. Endigi basty maqsat - sýperlıgaǵa shyǵarý. Qazir komandada pálendeı ózgeris joq. Burynǵysha Vladımır Kojevnıkov bastaǵan mamandar jattyqtyratyn «Aqjaıyqqa» ázirge eki legıonerdi alýdy josparlaýdamyz. Oǵan qosa kelesi jyldan bastap «Aqjaıyq» oıynshylarynan quralatyn dopty hokkeıden Qazaqstan ulttyq quramasy da «Jastar» stadıonynda jattyǵatyn bolady. Bıylǵy álem birinshiliginde qazaqstandyqtar besinshi orynǵa túsip qaldy. Munyń sebebi - olardyń basy qosylmady, jattyǵý jıyndary bolǵan joq, oıynshylar birin-biri túsinbedi. «Jastar» stadıonynda «QPO b.v.» kompanııasynyń qarjysyna salynyp jatqan jasandy muz aıdyny aldaǵy qarasha aıynyń sońynda paıdalanýǵa berilgeli otyr. Bul sportshylardyń muz aıdynynda kóbirek daıyndalýyna múmkindik beredi», - dedi «QazAqparat» tilshisine Azamat Shaıhy.
