«Aqjaıyq» óz alańynda «Qaıratqa» ese jiberdi
ORAL. QazAqparat - Fýtboldan premer-lıga komandalary arasynda QR chempıonatynyń 19-týrynda Oraldyń «Aqjaıyǵy» P.Atoıan atyndaǵy stadıonda Almatynyń «Qaıratyn» qabyldady, dep habarlaıdy «QazAqparat» tilshisi.
Bul oıyn qos komanda úshin de mańyzdy edi. Almatylyqtar «Astanamen» chempıondyq ataqqa talasyp kele jatsa, oraldyqtar sońǵy, 12-orynǵa túsip qalǵan bolatyn. «Qaırattyń» sapynda eskertýleriniń kóptigine baılanysty komanda juldyzdarynyń biri, reseılik Andreı Arshavın men Qazaqstan quramasynyń múshesi jaraqaty bar Georgıı Jýkov alańǵa shyǵa alǵan joq. Degenmen, Baýyrjan Islamhan bastaǵan almatylyqtardyń quramynda onysyz da ataqty fýtbolshylar jeterlik edi. Sondyqtan birinshi taım negizinen «Qaırattyń» basymdylyǵymen ótkenimen, esep ashylǵan joq.
Matchtyń ekinshi kezeńinde qonaqtar kútpegen jerden gol soǵyp ketti. 58-mınýtta brazılııalyq legıoner Isaeldiń aıyp alańyna kirmesten tepken doby toǵyzdyqqa dál tústi. «Aqjaıyqtyń» qaqpashysy Denıs Tólebaevtyń typyr etýge murshasy kelgen joq. Kezdesý sońyna taman alań ıeleri alǵa umtylyp baqty. Sondaı sátterdiń birinde oıynǵa tyńnan qosylǵan Ivan Antıpovty almatylyq qorǵaýshy óz aıyp alańynda shalyp jyqty. Alaıda Qazaqstan jastar quramasynyń oıynshysy ıÝrıı Pertsýh tepken 11 metrlik aıyp dobyn «Qaırattyń» qaqpashysy, Oral fýtbolynyń túlegi Stas Pokatılov qaıtara bildi. Sóıtip ol óz komandasyna jeńis syılap, «Aqjaıyqty» bir upaıdan aıyrdy dese de bolady. Bálkim, 21 jasar ıÝ.Pertsýhqa qaraǵanda, tájirıbelileý fýtbolshy penaltıdi oryndaǵanda, oraldyqtar teń oıynǵa qol jetkizer me edi degen saýal kókeıde qaldy.
Aıta keteıik, bul týrdan keıin óz alańynda 2:0 esebimen Qyzylordanyń «Qaısaryn» utqan «Astana» 48 upaımen burynǵysha kósh bastap keledi. Ekinshi oryndaǵy «Qaırattyń» odan bes upaıy kem. Al Shymkentte Qaraǵandynyń «Shahterin» 1:0 esebimen tize búktirgen «Ordabasy» komandasy 38 upaımen úzdik úshtikti túıindep tur.
