«Aqjaıyq» óz alańynda «Ertiske» ese jiberdi
ORAL. QazAqparat - Fýtboldan premer-lıga komandalary arasynda Qazaqstan chempıonatynyń 22-shi týrynda Oraldyń «Aqjaıyǵy» óz alańynda Pavlodardyń «Ertisin» qabyldady, dep habarlaıdy «QazAqparat» tilshisi.
Bul joly oraldyqtardyń bas bapkeri Vahıd Masýdov qaqpaǵa Denıs Tólebaevtyń ornyna Vıacheslav Kotlıardy qoıdy, basqa ózgeris bolǵan joq. 18-mınýtta «Aqjaıyq» qorǵaýshylarynyń qateliginen keıin «Ertistiń» quramyndaǵy moldovalyq shabýylshy Igor Býgaev esep ashty. Al 10 mınýttan keıin sol qaptaldan pavlodarlyqtardyń aıyp alańyna kirgen Azat Ersalımovty qonaqtar shalyp jyqty. Alaıda paragvaılyq legıoner Freddı Koroneldiń tepken doby qaqpa mańdaıshasynan keri qaıtty. Osymen «Aqjaıyq» oıynshylary ekinshi ret penaltıdi sátti oryndaı almady. Budan buryn Almatynyń «Qaıratymen» oıynda ıÝrıı Pertsyhtyń oryndaǵan 11 metrlik aıyp dobyn Stas Pokatılov qaıtaryp, «Aqjaıyqtyń» teń oıynǵa qol jetkizýine múmkindik bermegen bolatyn.
Ekinshi taımda alań ıeleri alǵa umtylǵanymen, túk bitire almady. Qaıta qarymta shabýylda pavlodarlyqtardyń gol soǵatyndaı keremet múmkindikteri boldy. Sonyń birinde V.Kotlıar seıv jasap, dopty qaıtara bildi.
Sóıtip, 0:1 esebimen utylǵan «Aqjaıyq» 16 upaımen burynǵysha sońǵy orynda keledi. Al «Ertis» 34 upaımen qaıtadan tórtinshi orynǵa kóterildi.
Aıta keteıik, keshe Qaraǵandyda «Shahterdi» 1:0 esebimen utqan «Taraz» komandasy ekinshi aınalym sońynda altynshy satyǵa shyqty. Osyndaı eseppen óz alańynda Qostanaıdyń «Tobylyn» tize búktirgen «Atyraý» jetinshi orynda keledi.
Búgin Kókshetaýdyń «Oqjetpesi» Qyzylordanyń «Qaısaryn» 3:1 esebimen jeńdi. Aqtóbede jergilikti komandany 2:1 esebimen súrindirgen Almatynyń "Qaıraty" 47 upaımen burynǵysha ekinshi orynda keledi. «Astana» - «Ordabasy» arasyndaǵy kezdesý 7 tamyz kúni ótedi.
