«Aqjaıyq» oıynshylary jol apatynan zardap shekken jankúıerge qoldaý kórsetti
«Aqjaıyq» FK baspasóz qyzmetinen málim etkenindeı, biraz jyldan beri oraldyq klýbqa jankúıerlik etip júrgen Mıra Elekesheva 7 aqpan kúni jol apatyna ushyraǵan.
Saldarynan toqpan jiligi zaqymdanǵan qyzǵa 9 aqpanda ota jasaldy.
Rysbek Qońyrov, Samat Berdáýletov, Rýslan Haırov, Baýyrjan Omarov jáne Meıram Sapanov syndy oıynshylar aýrýhanaǵa arnaıy kelip, Mıramen kezdesti.
«Komanda jankúıerleri árdaıym ózara jaǵdaı surasyp turamyz. Aýrýhanada jatqanymda, Nuraly esimdi dosym habarlasyp, tómenge túsýimdi ótindi. Sálem-saýqat qabyldaý ornyna barǵanymda, súıikti komandamnyń oıynshylaryn kórip, qatty tańqaldym. Maýsym barysynda biz fýtbolshylardy qoldasaq, osyndaı qıyn jaǵdaıǵa tap bolǵanda, oıynshylar meni qoldaı keldi. Qýanyshtymyn, - deıdi Mıra Elekesheva.
Oıynshylar jankúıerge densaýlyq tilep, komanda ony qoldaýǵa ázir ekenin aıtty. Sondaı-aq Meıram Sapanov oıyn jeıdesin syılasa, Baýyrjan Omarov jankúıer sharfyn tartý etti.
Eske sala keteıik, budan buryn «Aqjaıyq» fýtbol klýbyna jańa bas bapker taǵaıyndalǵanyn jazǵan bolatynbyz.
Foto – «Aqjaıyq» fýtbol klýby