«Aqjaıyq» iri eseppen «Ordabasy» komandasyn utty
ORAL. QazAqparat - Fýtboldan el birinshiliginiń besinshi týrynda Oraldyń «Aqjaıyǵy» «Ordabasy» komandasyn iri eseppen utty, dep habarlaıdy QazAqparat tilshisi.
Shymkenttikter buǵan deıin birde-bir upaı joǵaltpaǵan, «Astanamen» birge kósh bastap kele jatqan klýb bolatyn.
Aqsaı qalasyndaǵy «Qarashyǵanaq» stadıonynda ótken matchta alań ıeleri oıyn tizginin birden qolǵa aldy. 13-mınýtta aıyp alańyndaǵy qarbalas sátti paıdalana bilgen Qazaqstan jastar quramasynyń múshesi, jartylaı qorǵaýshy Ivan Antıpov esep ashty. 17-mınýtta óz aıyp alańynda qonaqtar tártip buzǵannan keıin 11 metrlik penaltı belgilendi. Bul núkteden Erkebulan Nurǵalıev qaqpa buryshyn dál kózdep, esepti 2:0-ge jetkizdi.
«Aqjaıyqtyń» qarqyny budan keıin de báseńdegen joq. 26-mınýtta buryshtamadan berilgen doptan keıin horvatııalyq qorǵaýshy Hrvoe Spahııa tártip buzyp, alańnan qýyldy. Bul joly 11 metrlikten E.Nurǵalıevtiń tepken dobyn «Ordabasynyń» qaqpashysy Jasýr Narzıkýlov qaıtara bildi. Esesine 38-mınýtta qonaqtardyń shabýylshysy Tımýr Dosmaǵambetov sheberlik tanytyp, esepti qysqartty. Degenmen 44-mınýtta ýkraınalyq shabýylshy Aderınsola Habıb Eseola «Aqjaıyq» sapyndaǵy alǵashqy dobyn soqty.
Ekinshi taımda mergendigimen kózge túsken Habıb Eseola 78-mınýtta taǵy bir goldyń avtory atandy.
Osylaısha Vladımır Mazıardyń shákirtteri kútpegen jerden shymkenttik fýtbolshylardy 4:1 esebimen jeńip ketti.
«Oıynnyń aldynda bizben oblys ákimi kezdesip, komandaǵa senetindigin bildirgen bolatyn. Bul bizge kúsh-jiger qosty. Aldaǵy ýaqytta da osyndaı qoldaý bolatynyna senemiz. Aqsaıda biz Oraldaǵydaı sezinýdemiz. Búgin fýtbolshylar tártippen, berile oınady. Eseolanyń gol soqqany da qýantty. Degenmen bizde jaraqat alǵandar barshylyq, olar tezirek qatarǵa qosylsa deımiz. Alańda tórt-aq legıoner boldy, jergilikti oıynshylarǵa úmit artýdamyz. Mundaı jeńisten keıin olar óz sheberlikterin ústeı túsetin bolady», dedi kezdesýden keıingi baspasóz máslıhatynda V.Mazıar.
Aıta keteıik, oraldyqtar kelesi oıynyn 22 sáýir kúni syrt alańda Qostanaıdyń «Tobylymen» ótkizedi. Osy týrda Shymkentte alań ıeleri esebindegi «Aqtóbeni» 1:0 esebimen tize búktirgen qostanaılyqtar týrnır kestesinde 12 upaımen ekinshi orynǵa kóterildi. Qorjynynda dál sondaı upaıy bar «Ordabasy» úshinshi satyǵa yǵyssa, «Qaıratpen» teń oınaǵan astanalyqtar 13 upaımen kósh bastap keledi. Almatylyqtar 11 upaımen tórtinshi satyda tur. ıAǵnı bul - kósh bastaýshy komandalar arasynda báseke qyza túsedi degen sóz. Eń sońǵy oryndaǵy «Atyraýmen» teń oınaǵan Qaraǵandynyń «Shahteri» (8 upaı) besinshi orynǵa ornyqsa, «Aqjaıyq» 7 upaımen úzdik altylyqty túıindep tur.
22 sáýir kúni sondaı-aq «Qyzyljar» - «Atyraý», «Shahter» - «Aqtóbe», «Ordabasy» - «Astana», «Qaırat» - «Qaısar», «Jetisý» - «Ertis» oıyndary ótedi. Ortalyq matchtyń Shymkentte bolatyny anyq. «Aqjaıyqtan» ońbaı utylǵan «Ordabasy» óz alańynda jerge qaramaý úshin astanalyqtarmen kezdesýde baryn salatyny túsinikti.
