«Aqjaıyq» fýtbol klýbynyń bıýdjeti 1 mlrd. teńgege jetpeıdi - Ásııa Amanbaeva
ORAL. QazAqparat - «Aqjaıyq» fýtbol klýbynyń bıýdjeti ózge otandyq komandalarmen salystyrǵanda, óte az dep aıtýǵa bolady (1 mlrd teńgege jetpeıdi). Bul týraly búgin Batys Qazaqstan óńirlik kommýnıkatsııalar qyzmeti alańynda BQO dene shynyqtyrý jáne sport basqarmasynyń basshysy Ásııa Amanbaeva málim etti, dep habarlaıdy «QazAqparat» tilshisi.
Onyń aıtýynsha, bul qarjyǵa kóp adam qate túsinip júrgenindeı, tek qana legıoner oıynshylardyń transferleri kirmeıdi.
«Sonymen birge osy qarjy klýbtyń qyzmetkerlerine jalaqy tóleýge, qajetti dári-dármekterdi satyp alýǵa, jalpy, «Aqjaıyq» fýtbol klýbynyń barlyq ınfraqurylymyn kútip ustaýǵa jumsalady. «Aqjaıyq» FK janyndaǵy balalardyń fýtbol ortalyǵy (700-ge jýyq adam), ortalyqtyń tórt aýdandaǵy (Syrym, Qaratóbe, Terekti, Bórli) jáne Oral qalasyndaǵy sonsha fılıaly da osy qarjyny paıdalanady. Bıyl biz klýbtyń bazasynda baqylaýshylar keńesin qurdyq. Onyń quramyna qoǵamdyq uıymdardyń, oıyn túrleri federatsııasynyń ókilderi jáne oblystyq máslıhattyń depýtttary endi. Sol sebepti bul másele bizdiń udaıy baqylaýymyzda», - dedi Á.Amanbaeva.
Aıta keteıik, fýtboldan premer-lıga komandalary arasynda QR birinshiliginde óner kórsetetin Oraldyń «Aqjaıyǵy» qazirgi tańda týrnır kestesinde 11-inshi orynda keledi.
Jalpy, óńirde 57 sport, sonyń ishinde 28 olımpıadalyq sport túrin damytýǵa kóńil bólinýde. BQO dene shynyqtyrý jáne sport salasynyń bıylǵy bıýdjeti 3 056 264,0 myń teńgeni qurasa, bıylǵy birinshi jartyjyldyqta sonyń 56 paıyzy ıgerildi.
