«Aqjaıyq» fýtbol klýbynyń bas bapkeri ornynda qalatyn boldy
ORAL. QazAqparat – Premer-lıgada óner kórsetetin «Aqjaıyq» fýtbol klýbynyń bas bapkeri, ýkraınalyq maman Vladımır Mazıar ornynda qalatyn boldy, dep habarlaıdy QazAqparat tilshisi.
V.Mazıar el chempıonatynyń 16-týrynda Almatyda «Qaıratpen» ótken matchtan keıin óz ornynan ketetini jóninde málimdegen bolatyn.
«Aqjaıyq» fýtbol klýbynyń basshylyǵy osydan soń oıynshylar men bas bapkerdiń arasynda kezdesý ótkizgen.
«Klýb oıynshylary bapkerdi tolyqtaı qoldady – bul basshylyqqa onyń ornynan ketýi jónindegi ótinishin qabyldamaýǵa negiz boldy. Jazǵy transferlik kezeńde komanda jańa oıynshylarmen kúsheıtiledi. Bul komandanyń ishindegi básekelestikti arttyryp, jaǵdaıdy túzeýge septesedi», - dep habarlady «Aqjaıyq» fýtbol klýbynan.
Qazirgi kezde oraldyqtar týrnır kestesinde 12 upaımen 13-orynda, ıaǵnı birinshi lıgaǵa túsip qalý qaýpi tónip tur.
«Aqjaıyq» 8 shilde kúni Qazaqstan kýbogy úshin Qyzylordada jergilikti «Qaısarmen» kezdesedi.
Eske sala keteıik, budan buryn fýtboldan Qazaqstan chempıonatynda «Aqtóbeniń» kósh bastaǵanyn jazǵan bolatynbyz.
Foto: www.instagram.com/fcakzhayik
