«Aqjaıyq» fýtbol klýby jankúıerler úshin arnaıy avtobýs shyǵardy
ORAL. QazAqparat - «Aqjaıyq» fýtbol klýby jankúıerlerdiń Aqsaıǵa baryp-qaıtýy úshin arnaıy avtobýs shyǵardy, dep habarlaıdy QazAqparat tilshisi.
Premer-lıga komandalary arasynda el birinshiliginiń úshinshi týrynda Oraldyń «Aqjaıyǵy» óz alańyndaǵy alǵashqy oıynyn 31 naýryz kúni Aqsaı qalasyndaǵy «Qarashyǵanaq» stadıonynda ótkizedi. Sol kúni jergilikti saǵat 14.00-de ýkraınalyq maman Vladımır Mazıardyń shákirtteri chempıonatta ázirge jeńilis tappaı, kósh bastaýshylardyń qatarynda kele jatqan Pavlodardyń «Ertisin» qabyldaıdy.
Arnaıy avtobýs jankúıerlerdi tegin aparyp, alyp qaıtady. Stadıonǵa kirý de tegin.
«Mamyr aıyna deıin oıyndar Aqsaı qalasynda ótedi. Kún jylynyp, qalypqa túskennen keıin Oraldaǵy P.Atoıan atyndaǵy stadıonǵa kóshemiz. Qazirgi kezde komanda aldaǵy kezdesýge daıyndyq ústinde. «Aqjaıyqtyń» jeńis úshin baryn salatyny anyq», - dedi «QazAqparat» tilshisine «Aqjaıyq» fýtbol klýbynyń dırektory Nurtaza Ábilhanov.
Foto: fishki.net
