«Aqjaıyq» fýtbol klýby senimgerlik basqarýǵa berildi
ORAL. QazAqparat - «Aqjaıyq» fýtbol klýby senimgerlik basqarýǵa berildi. Bul týraly búgin óńirlik kommýnıkatsııalar qyzmetinde oblystyq dene shynyqtyrý jáne sport basqarmasynyń basshysy Ásııa Amanbaeva málim etti, dep habarlaıdy QazAqparat tilshisi.
Onyń aıtýynsha, klýb satyp alý quqyǵymen bes jyl merzimge berildi.
«Aqjaıyq» fýtbol klýbynyń bıýdjeti premer-lıgada óner kórsetetin komandalar arasynda eń azy bolyp esepteledi, 1 mlrd teńgege de jetpeıdi. Bul qarjy oıynshylardyń jalaqysyna ǵana ketpeıdi. Sonymen qatar Oral qalasy men tórt aýdandaǵy balalar fýtbol ortalyqtaryna qarjy bólinedi, olarda jeti júzdeı jetkinshek jattyǵady.
«Qazirgi kezde «Aqjaıyq» fýtbol klýbynyń bas bapkeriniń máselesi qarastyrylýda», dedi Á.Amanbaeva.
Komandanyń bas bapkeri bolǵan ýkraınalyq maman Vladımır Mazıar 13 mamyr kúni «Aqjaıyq» Aqtóbe qalasynda 3:5 esebimen jeńilis tapqannan keıin ketip qalǵan bolatyn. Qazirgi kezde bas bapker mindetin jergilikti maman Artýr Avakıants atqarýda.
Jalpy, «Aqjaıyqtyń» bıylǵy qarqyny jaman emes. Bas jattyqtyrýshydan keıin komanda surmergeni, ýkraınalyq shabýylshy Aderınsola Eseolanyń «Qaıratqa» aýysyp ketkenine qaramastan, oraldyqtar týrnır kestesinde altynshy orynda keledi.
A.Avakıantstyń shákirtteri kezekti kezdesýin 23 maýsym kúni Shymkentte «Ordabasy» komandasymen ótkizedi.
Oblysta «Aqjaıyq» fýtbol klýby» JShS-dan basqa «Aqjaıyq» sport klýby» JShS, «Jaıyq» voleıbol klýby» MKQK jumys jasaıdy.
Eske sala keteıik, dopty hokkeıden «Aqjaıyq» sport klýbynyń ótken jyly aýktsıonda 11 mln teńgege satylǵanyn budan buryn jazǵan bolatynbyz.
