«Aqjaıyq» dopty hokkeı klýbyna jańa bapker men oıynshylar keldi
ORAL. QazAqparat - Dopty hokkeıden joǵary lıga komandalary arasynda Reseı chempıonatynda óner kórsetetin Oraldyń «Aqjaıyǵyna» jańa bapker men oıynshylar keldi, dep habarlaıdy QazAqparat.
«Aqjaıyq» sport klýbynyń dırektory Azamat Shaıhynyń aıtýynsha, bas bapkerlikke Saratovtan (RF) kelgen Vladımır Kojevnıkov taǵaıyndaldy. Ol osyǵan deıin «Aqjaıyqpen» bir topta oınap júrgen Saratovtyń «Ýnıversalyn» jattyqtyryp, biraz tabysqa qol jetkizgen. Komandany kúsheıtý maqsatynda jańa bapkermen birge Reseıden jeti birdeı oıynshy alyndy. Olar: jartylaı qorǵaýshylar Sergeı Gavrılov (Qazan), Evgenıı Sýkovın (Omby), Artem Nedostýpov (Saratov), Maksım Nıkıshov (Krasnotýrınsk), qorǵaýshylar Sergeı Panteev (Navashıno, Nıjegorod oblysy) jáne Aleksandr Podmetalın (Saratov). Oǵan qosa ótken jylǵy maýsymda «Aqjaıyq» quramynda mergendigimen kózge túsken taǵy bir reseılik, shabýylshy Sergeı Bashaev (Isheevka, Ýlıanov oblysy) óner kórsetýin jalǵastyrady.
«Basty maqsat - óz tobymyzda tabysty oıyn órnegin kórsetip, fınaldyq saıystarǵa joldama alý», dedi Azamat Shaıhy.
Aıta keteıik, qazirgi kezde «QPO b.v» kompanııasynyń qarjysyna «Jastar» stadıonynda jasandy muz aıdyny salynýda. Sondyqtan «Aqjaıyq» jańa maýsymda óz aıdynyndaǵy kezdesýlerin Oralǵa qarasty Zachagan kentindegi «Stenovık» stadıonynda ótkizedi.
