«Aqjaıyq» dopty hokkeı klýby jańa maýsymǵa daıyndalyp jatyr

ORAL. QazAqparat – Dopty hokkeıden Reseı joǵary lıgasynda óner kórsetetin Oraldyń «Aqjaıyǵy» jańa maýsymǵa daıyndyq ústinde, dep habarlaıdy QazAqparat tilshisi.

«Aqjaıyq» sport klýbynyń dırektory Damır Qalaqovtyń aıtýynsha, jýyrda dopty hokkeıshiler Túrkııaǵa oqý-jattyǵý jıynyna baryp keldi.

«Komandada ázirge jergilikti oıynshylar óz sheberlikterin shyńdaýda. Jeltoqsan aıyna taman Orynborǵa baryp, daıyndyqty ushtaı túsemiz. Sonda klýbqa eki-úsh legıoner alamyz ba degen oıdamyz», - dedi QazAqparat tilshisine D.Qalaqov.

«Aqjaıyqty» burynǵysha oraldyq maman Nıkolaı Shavaldın jattyqtyrsa, komanda kapıtany Maksım Ótebalıev Shvetsııa chempıonatyna aýysty.

1976 jyly qurylǵan batysqazaqstandyq komanda qazirgi tańda Qazaqstandaǵy jalǵyz kásibı klýb bolyp esepteledi.

«Aqjaıyq» 2022-2023 jylǵy maýsymda 3-topta «Maıak» (Krasnotýrınsk), «SKA-Sverdlovsk» (Ekaterınbýrg), «Nıkelşık» (Verhnıı Ýfaleı), «Znamıa-Ýdmýrtııa» (Votkınsk), «Lokomotıv» (Orynbor) komandalarymen birge óner kórsetedi.

N.Shavaldınniń shákirtteri betashar oıyndaryn 16-17 jeltoqsanda Orynborda jergilikti «Lokomotıvpen» ótkizedi. Al 20-21 jeltoqsanda Oralda «Znamıa-Ýdmýrtııa» komandasyn qabyldaıdy.

Ótken maýsymda «Aqjaıyq» óz tobynda úshinshi orynǵa ıe bolyp, fınaldyq oıyndarǵa joldama alǵan edi. Sodan keıin joǵary lıga fınalyn jetinshi orynmen aıaqtady.

Eske sala keteıik, budan buryn dopty hokkeı fınalynda «Aqjaıyqtyń» jetinshi orynǵa ıe bolǵanyn jazǵan bolatynbyz .