«Aqjaıyq» bı ansambli «Rýhanı qazyna» baıqaýynda úzdikter qatarynan kórindi
ORAL. QazAqparat – «Aqjaıyq» halyqtyq bı ansambli Nur-Sultan qalasynda ótken mádenıet jáne óner salasy uıymdary men qyzmetkerleriniń «Rýhanı qazyna» respýblıkalyq onlaın festıvalinde úzdikter qatarynan kórindi, dep habarlaıdy QazAqparat tilshisi.
Osyǵan oraı elordaǵa jeńimpazdardy marapattaý rásimine baryp qaıtqan oblystyq halyq shyǵarmashylyǵy ortalyǵynyń dırektory Máýlet Jubatovtyń aıtýynsha, bıyl úshinshi ret ótkizilgen saıysqa respýblıka boıynsha barlyǵy 250-den astam ujym qatysqan.
Solardyń ishinde 40 jyldan astam tarıhy bar, halyqaralyq jáne respýblıkalyq baıqaýlardyń laýreaty «Aqjaıyq» halyqtyq bı ansambli «Úzdik kórkemónerpazdar ujymy – 2020» atalymy boıynsha jeńimpaz atandy.
«Bir atap óter jaıt, Ásel Dáýletova jetekshilik etetin «Aqjaıyq» bı ansambli kásibı ujym emes. Onda túrli salada qyzmet atqaratyn, joǵary oqý oryndarynda bilim alyp júrgen jastar bar. Soǵan qaramastan, ansambldiń kórkemdik deńgeıi jyl saıyn ósip kele jatqany qýantady», - dedi M.Jubatov.
«Ansamblge stýdent kezimnen bastap keldim. 2009 jyldan beri jetekshilik etýdemin. Qazirgi kezde 16 qyz sheberliǵyn ushtaı túsýde. Jyl saıyn ansambl quramy jańaryp otyrady. Bolashaqta jańa baǵdarlamalar jasap, osyǵan deıin qol jetkizgen tabystarymyzdy molaıta túspekshimiz», - dedi QazAqparat tilshisine Ásel Dáýletova.
