Aqjaıyq aýdanynyń turǵyndary da Elbasy Joldaýyn jyly qabyldap otyr - BQO
ORAL. 29 qańtar. QazAqparat /Eljan Eraly/ - Elbasy N.Nazarbaevtyń bıylǵy Joldaýyn Aqjaıyq aýdanyndaǵy barlyq ujymdar men mekemeler úlken yqylaspen tyńdady.
Aýdandyq ortalyqtandyrylǵan kitaphana júıesi qyzmetkerleri jergilikti saǵat 10-da osyndaǵy májilis zalynda teledıdar aldyna jınaldy. Tuńǵysh Prezıdenttiń bıylǵy Joldaýy da áserli shyqty. Eń mańyzdysy, naqty derekter men shyndyqtyń ushtasýy edi. Bilim salasy bolsyn, áleýmettik máseleler bolsyn, tipti, jemqorlyqpen tanymal bolǵan sheneýnikterdiń anyq sanyna deıin aıtyldy. Jetken bıik pen jetpegen jerler alaqandaǵydaı saralandy. Álemdegi qazaq eliniń sapalyq salmaǵy da, kúsh-qýaty da aldyńǵy kóshke ıek artqany qýantady. Joldaý tyńdalyp bolǵan soń sóz alǵan kitaphana dırektory Roza Musaǵalıeva óz áriptesterimen áserin bólisti.
«Kezekti Joldaý - kemel keleshek kepili, - dedi R.Musaǵalıeva,- bizdiń halyq aldaǵandy súımeıdi, aıalaǵandy túsinedi. Aıalaýǵa ne jatady desek: beıbitshilik, birlik, yntymaq, eldiń toqtyǵy. Al, osynyń bárin Nursultan Ábishuly úlken tabandylyqpen júzege asyryp keledi. Jaı ǵana mysal keltire ketsem: sońǵy bir-eki jylda ótken ýaqytpen salystyrǵanda jańa kitaptar mol shyqty. Ertegiler, batyrlar jyry, qazaq klassıkteriniń shyǵarmalar jınaǵy. Osynyń ózinen-aq rýhanı dúnıemizdiń kókjıegi anyq, keregesi bıik ekenin ańǵartady. Al buǵan qamqor bolyp otyrǵan Elbasymyz Nursultan Nazarbaev. Bul is jalǵasyn tabary sózsiz. Al Elbasynyń referendým arqyly ókilettigin uzartý rýhanı dúnıemizdiń de qajeti úshin qamdanys bolar edi».
Osy kitaphananyń ádiskeri Saǵyntaı Bısenǵalıevtiń pikirinshe, san ult mekendegen Sary qurlyqtaǵy alpaýyt elder Japonııa, Koreıa, Qytaı sekildi memlekettermen ıyq tirese qatar turyp, aq Azıadanyń jalaýyn jelbiretý de burynǵy keńes elderiniń eshqaısysyna buıyrmaǵan baqyt! Bul - Elbasynyń jeńisi! Oǵan halyq senedi.
Dál osyndaı jıyndar aýdan ortalyǵyndaǵy mekemeler men okrýg ortalyqtarynda ótip, onda turǵyndar Elbasy Joldaýyn tolyqtaı qoldaıtyndyqtaryn bildirdi.
