«Aqjaıyq» tartysty matchta qarsylasyna ese jiberdi

Dopty hokkeıden joǵary lıga komandalary arasynda búkilreseılik jarysta Oraldyń «Aqjaıyǵy» jańa jyldaǵy alǵashqy kezdesýin Votkınskide jergilikti «Znamıa-Ýdmýrtııa» komandasymen ótkizdi, dep habarlaıdy Kazinform.

Osyǵan deıin tórt oıynynda jeńiske jetken oraldyqtarǵa bul joly ońaı tıgen joq.

Birinshi taımda aıdyn ıelerinen Evgenıı Cherepanov esep ashsa, «Aqjaıyqtyń» surmergeni Mıhaıl Pahomov tarazy basyn teńestirdi.

Artem Nıkýlın jergilikti komandany alǵa shyǵarsa, M.Pahomov 12 metrlik penaltıdi múltiksiz oryndady. Biraq Dmıtrıı Salımov esepti 3:2-ge jetkizdi.

Ekinshi taımda oraldyqtardan Ivan Zaharov esepti teńestirgenimen, oıyn sońyna taman E.Cherepanov jeńis golyn soǵyp ketti — 4:3.

Erteń qos klýb ekinshi kezdesýin ótkizedi.

Eske sala keteıik, budan buryn «Aqjaıyqtyń» orynborlyq klýbty 10:2 esebimen utqanyn jazǵan bolatynbyz.