«Aqjaıyq» rezervatynyń tutaný qaýpi bar ýchaskelerine táýlik boıy kezekshilik qoıyldy
ASTANA. KAZINFORM — Atyraý oblysynyń jedel shtabynyń tapsyrmasy negizinde órt shyǵýy múmkin aýmaqtarda táýlik boıyna kezekshilik uıymdastyryldy, dep habarlaıdy oblysy ákimdigi.
13 maýsymnan beri Atyraý oblysynda jalpy aýdany 805 ga qamys órtiniń birneshe oshaǵy sóndirildi. TJD málimetinshe, qazir Atyraý qalasynan 37 km jerde shamamen 7 ga alańdaǵy órt bolyp jatyr. Órt sóndirý jumystaryn qalyń qamys pen ekpindi jel qıyndatyp otyr. Órtti sóndirýge TJM men tabıǵı rezervattyń barlyq qajetti kúshteri men quraldary tartyldy. Jumys bastalǵannan beri TJM avıatsııasy órt oshaqtaryna 33 ret sý tókti.
— Órt ornynda jedel shtab jumys jasap jatyr. Oblystyq TJD bastyǵy Nurlan Jańabaev órt sóndirý jumystaryn basqarýda. Jaǵdaı TJ mınıstrliginiń turaqty baqylaýynda, — delingen habarlamada.
Ákimdik taratqan aqparatqa sáıkes, «Aqjaıyq» rezervatynyń aýmaǵyndaǵy órt tutaný qaýpi bar ýchaskelerge táýlik boıy kezekshilik qoıyldy. Órt birneshe qaıtara sóndirilgenine qaramastan, «Aqjaıyq» tabıǵı rezervatynyń jekelegen ýchaskelerinde ot qaıta tutanyp jatyr. Bul shymtezekti jáne batpaqty alqaptarǵa tán jaǵdaı. Mundaı órt oshaqtary uzaq ýaqyt boıyna joıylmaı, kún ysyǵan ýaqytta qaıta tútindeýi yqtımal.
— Osyǵan oraı, Atyraý oblysynyń jedel shtabynyń tapsyrmasy negizinde órt shyǵýy múmkin aýmaqtarda táýlik boıyna kezekshilik uıymdastyryldy. Oǵan tótenshe jaǵdaılar departamenti, polıtsııa qyzmetkerleri, orman sharýashylyǵy ókilderi men «Aqjaıyq» MTR ınspektorlary turaqty rejımde jumyldyryldy. Buǵan qosa, jaǵdaıǵa jerden de, áýeden de monıtorıng jasalyp otyr. Jańa órt oshaǵynyń paıda bolýy men qaıta tutaný jaǵdaıynda shuǵyl áreket etýge basa nazar aýdarylǵan, — dep atap ótti vedomstvo.
Budan buryn «Aqjaıyqtaǵy» órtke tikushaqpen 100 tonna sý tógilgeni habarlanǵan edi.