«Aqjaıyq» rezervatyndaǵy qamys órti sóndirilgenmen, aýmaq byqsyp jatyr
ATYRAÝ. KAZINFORM – Atyraý qalasy Erkinqala aýyldyq okrýginen Kaspıı teńizine qaraı 35 km qashyqtyqta «Aqjaıyq» MTR 18,26 kvartalyndaǵy qamys órti óshirilgenmen, byqsyp jatqan aýmaqtar bar.
Resmı málimetke súıensek, oqıǵa ornyna Atyraý oblysy TJD men «Aqjaıyq» MTR-nan barlyǵy 65 adam, 18 tehnıka jumyldyryldy.
Órt aýmaǵy 12 ga qurady. 1 mamyr saǵat 07:53-te janý oqshaýlanǵan.
– Jerdiń sýly-batpaqty bolýy órt sóndirý avtokólikteriniń ótýine qıyndyq týdyrdy. Traktor men soqa arqyly 30 shaqyrym qashyqtyqta jerdi jyrtý jumystary júrgizilip, kúshter rantsty órt sóndirgishpen órtti sóndirý jumystaryn júrgizdi, - dep habarlady TJD baspasóz qyzmeti.
Oqıǵa ornynda TJD bastyǵynyń birinshi orynbasary azamattyq qorǵaý podpolkovnıgi Ábdilda Baıakeev jetekshilik etýde. Jaýaptylar eldimekenge qaýip joq ekenin málimdedi.
Aıta keteıik, rezervat aýmaǵyndaǵy qamys órti 30 sáýir kúni 17:00 shamasynda bastalǵan edi.
