«Aqjaıyq» rezervatyndaǵy ahýal baqylaý munaralarynan tikeleı kórsetilip jatyr
ATYRAÝ. KAZINFORM – Atyraýda «Aqjaıyq» memlekettik tabıǵı rezervaty aýmaǵynda monıtorıngti kúsheıtý, órt tutanǵan jaǵdaıda jedel áreket etý maqsatynda baqylaý munaralarynan tikeleı beınetranslıatsııa iske qosyldy.
Atyraý oblysy ákiminiń baspasóz qyzmetiniń málimetinshe, rezervat aýmaǵyna teplovızorlarmen, kameralarmen jabdyqtalǵan úsh statsıonarlyq munara ornatylǵan.
– Bul rezervattaǵy jaǵdaıdy táýlik boıy baqylaýda ustaýǵa múmkindik beredi. Baqylaý munaralary 2024 jyly Atyraý oblysy ákiminiń tapsyrmasymen bıýdjet qarajatyna qondyryldy. Onlaın rejımdegi translıatsııany kórýge bolady. Endi Atyraý oblysynyń turǵyndary rezervat aýmaǵyndaǵy jaǵdaıdy baqylap, tútin nemese ottyń tutanǵanyn baıqasa, jedel áreket etý qyzmetterine habarlaı alady, - dep habarlady ákimdiktiń baspasóz qyzmeti.
Eske sala ketelik, buǵan deıin tótenshelikter Atyraý turǵyndaryna tútin men ystyń ıisine baılanysty kóshege shyqpaýdy eskertti.
Al keshe Atyraýda «Aqjaıyq» tabıǵı rezervatyndaǵy órtke tikushaqpen 100 tonna sý tógilgenin habarladyq.
Búgin Atyraýda «Aqjaıyq» tabıǵı rezervatyndaǵy qamys órti áli tolyq sónbegenin jazǵan bolatynbyz.