«Aqjaıyq» oıynshylary chempıonat matchyna qatysýdan bas tartty

ORAL. KAZINFORM – «Aqjaıyq» fýtbol klýbynyń oıynshylary chempıonat matchyna qatysýdan bas tartty.

Birinshi lıgada óner kórsetetin oraldyqtar búgin Aqtóbede jergilikti «Aqtóbe Jas»» komandasymen oınaýy kerek edi.

«Aqjaıyq» fýtbol klýbynyń dırektory Manarbek Erjanov áli kúnge deıin qarjy bólinbegendikten, oıynshylardyń osyndaı qadamǵa barǵandyǵyn aıtty. 

Fýtbolshylar oblys ákimdigine baryp, bes-alty aı boıy jalaqy almaǵandyqtan, qıyn jaǵdaıda qalǵandyǵyn jetkizdi.

BQO ákiminiń jaqynda taǵaıyndalǵan orynbasary Qaıyrjan Meńdiǵalıev máseleni zertteý úshin ózine ýaqyt kerektigin bildirdi.

«Aqjaıyq» týrnır kestesinde nebári 6 upaımen 15-orynda keledi. 

Eske sala keteıik, budan buryn «Aqjaıyq» fýtbol klýby jabyla ma, osyǵan baılanysty basqarma basshysy jaýap bergenin jazǵan bolatynbyz.