«Aqjaıyq» fýtbol klýby jattyqtyrýshylar men oıynshylarǵa 65 mln teńge qaryz
ORAL. KAZINFORM – BQO ákiminiń orynbasary Qaıyrjan Meńdiǵalıevtiń tóraǵalyq etýimen ótken jınalysta «Aqjaıyq» fýtbol klýbynyń qarjylyq jaǵdaıy jáne fýtbolshylar men jattyqtyrýshylar aldyndaǵy qaryzdy sheshý máselesi talqylandy.
Jıynǵa klýbtyń quryltaıshysy Gúldarııa Kaýıevamen birge QR Týrızm jáne sport mınıstrligi dene shynyqtyrý jáne sport komıtetiniń ókili, BQO dene shynyqtyrý jáne sport basqarmasy basshylyǵy, QFF lıtsenzııalaý departamentiniń dırektory, BQO fýtbol qaýymdastyǵynyń prezıdenti men «Aqjaıyq» FK kapıtany, jattyqtyrýshylar quramy, sondaı-aq ınvestıtsııalyq negizde qyzyǵýshylyq tanytqan «SD Family» FK basshysy Dıdar Sydyqbek qatysty.
BQO dene shynyqtyrý jáne sport basqarmasynyń baspasóz qyzmetinen málim etkenindeı, jıynda talqylanǵan negizgi másele – «Aqjaıyq» fýtbol komandasyn el chempıonatynyń birinshi lıgasynda qaldyrý jáne tarıhy baı klýbty saqtap qalý.
Alaıda «Aqjaıyq» FK 2024 jyly fýtbolshylar men jattyqtyrýshylardyń eńbekaqysyn tólemegen. QR Memlekettik eńbek ınspektsııasy komıteti BQO boıynsha departamentiniń málimetine qaraǵanda, 36 adamǵa (oıynshylar men bapkerler quramy) 2024 jyldyń qańtar-qazan aılary úshin jalpy somasy 65 mln 252,002 myń teńge eńbekaqy tólenýi kerek. Qazaqstan fýtbol federatsııasynyń talaby boıynsha komanda el chempıonatynda oınaýy úshin burynǵy qaryzdaryn jabýǵa tıis.
«Aqjaıyq» fýtbol klýbynyń Qazaqstan chempıonatynyń birinshi lıgasynda óner kórsetýi úshin BQO ákimdigi barynsha jyldam sheshim shyǵarýdy kózdeıdi. Osy maqsatta qyzyǵýshylyq tanytqan ınvestormen klýb basshylarynyń ózara kelissóz júrgizýine múmkindik jasaldy. Ekijaqty kelissózder 2025 jylǵy 10 aqpanǵa deıin oń sheshimin tappasa, BQO dene shynyqtyrý jáne sport basqarmasy fýtboldan QR chempıonatynyń ІІ lıgasynan bastaıtyn basqa klýbty jasaqtaýǵa májbúr bolady. Jańa klýb Qazaqstan fýtbol federatsııasynyń talaptaryn saqtaı otyryp, qazirgi «Aqjaıyq» FK oıynshylaryn kelisim arqyly aýystyrady.
Negizgi mindet – fýtbolshylar men jattyqtyrýshylar aldyndaǵy qaryzdy qaıtaryp, óńirdegi osy sport túriniń qarqyndy damýyna jaǵdaı jasaý. Sonymen qatar balalar fýtbolynyń deńgeıin kóterip, jasóspirimder komandasyn jasaqtap, onyń QJ League (Qazaqstan jasóspirimder lıgasy) sapynda óner kórsetýi de mańyzdy.
Eske sala keteıik, budan buryn «Aqjaıyq» fýtbol klýbynyń tuıyqtan nelikten shyǵa almaı kele jatqanyn jazǵan edik. Sondaı-aq «Aqjaıyq» fýtbol klýby jabyla ma, soǵan baılanysty basqarma basshysy jaýap berdi.