«Aqjaıyq» fýtbol klýby jabyla ma — basqarma basshysy jaýap berdi
ORAL. KAZINFORM — Buǵan deıin qarjy bólinbeýine baılanysty «Aqjaıyq» fýtbol klýbyna jabylý qaýpi tónip tur degen aqparat taraǵan bolatyn. Osyǵan oraı BQO dene shynyqtyrý jáne sport basqarmasynyń basshysy Jeńis Nyǵmetýllın jaýap berdi.
Basqarma basshysy málim etkendeı, qazirgi kezde el chempıonatynda birinshi lıgada óner kórsetip júrgen «Aqjaıyq» fýtbol klýbyna josparlanǵan qarajat (400 mln teńge) eki sebepten bólinbeı otyr.
Jeńis Nyǵmetýllınniń sózine qaraǵanda, birinshiden, óńirde bolǵan sý tasqyny zardaptaryn joıýǵa baılanysty qarajat qaıta baǵdarlanýy múmkin.
Ekinshiden, «Aqjaıyq» fýtbol klýby quryltaıshysynyń jubaıyna qatysty QR Sybaılas jemqorlyqqa qarsy is-qımyl agenttigi qylmystyq is qozǵap, tergep jatyr.
«Biz qarajatty memlekettik satypalym arqyly oınatyp, „Aqjaıyq“ klýbyna beretin bolsaq, qarjynyń dittegen jerge jetpeý qaýpi bar. Qylmystyq istiń qalaı aıaqtalatynyn bilmeımiz. Eger memleketke zalal keltirilgen bolsa, ony óteý úshin aıyptalýshynyń jaqyn-jýyqtarynyń esepshotyna tyıym salynady. Oǵan qosa sý tasqyny zardapdaryn joıý maqsatynda shara qabyldanyp jatyr. Biraq „Aqjaıyq“ fýtbol klýbyna qaralǵan qarajat basqarma esebinde tur, eshqaıda ketken joq. Tek osy eki sebepten ýaqytsha toqtatylyp tur», -dedi J.Nyǵmetýllın.
Basqarma basshysy óńirde fýtboldy tunshyqtyrý kózqarasy joq ekendigin, qaıta damytý basty maqsat ekendigin málimdedi.
«Óıtkeni fýtbol — mıllıondardyń oıyny. Oǵan qyzyǵýshylyq bizdiń oblysta da joǵary. Bir ǵana mysal — 25-ten astam jeke fýtbol mektepterinde 2 myńnan astam balalar aqyly túrde jattyǵýda. Oǵan qosa myń jarymnan astam bala fýtbol álippesin tegin úırenýde. Sonymen qatar „Aqjaıyq“ klýbynyń fýtbol akademııasynda 110-nan astam bala tórt jas ereksheligine qaraı jarystarǵa qatysýda. Osy akademııany qoldaıtynymyzdy aıtyp, bul jóninde Qazaqstan fýtbol federatsııasymen kelissóz júrgizdik. QFF jáne ÝEFA-nyń óz talaptary bar. Tipti „Aqjaıyq“ fýtbol klýbyn chempıonattan alyp tastaǵan jaǵdaıdyń ózinde biz onyń quramyndaǵy akademııany saqtap qalý múmkindigin qarastyramyz. Tek akademııa shákirtteriniń jarystarǵa qatysýy úshin qarjylaı qoldaý kórsetýge „Aqjaıyq“ fýtbol klýby basshylyǵynyń kelisimi kerek», -dedi J.Nyǵmetýllın.
Basqarma basshysy «Aqjaıyq» stadıony 10 jyl merzimge senimgerlik basqarýǵa berilgenimen, kelisimshartta kórsetilgen talaptar oryndalmaǵandyqtan, sot sheshimimen memleketke qaıtarylǵanyn jetkizdi.
«Aldaǵy ýaqytta stadıonǵa jóndeý júrgizý úshin tıisti esep jasalyp, bıýdjettik ónim beriledi. Stadıon memleket qaramaǵynda bolǵanymen, „Aqjaıyqtyń“ Oraldaǵy oıyndaryn ótkizýge esh kedergi keltirip otyrǵan joqpyz. Jýyrda „Aqjaıyq“ óz alańynda „Kaspııdi“ qabyldasa, aldaǵy oıynyn da osy stadıonda ótkizedi», -dedi J.Nyǵmetýllın.
Eske sala keteıik, budan buryn «Aqjaıyq» fýtbol klýbynyń tuıyqtan nelikten shyǵa almaı kele jatqanyn jazǵan bolatynbyz.
Oraldyq komanda qazirgi kezde birinshi lıgada nebári 6 upaımen týrnır kestesinde 14-orynda keledi.
