Aqjarqyn Turlybaıdyń taǵdyry jyl sońynda sheshiledi

ALMATY. QazAqparat - Aqjarqyn Turlybaıdyń isi boıynsha sońǵy sot úkimi 2017 jyldyń aıaǵyna deıin shyǵady, dep habarlaıdy QazAqparat tilshisi. Bul týraly Aqjarqynnyń qorǵaýshysy Suńqar Nurmaǵambetov málim etti.

«Sot protsesi 2017 jyldyń sońyna deıin jalǵasýy múmkin. Osy ýaqytta Aqjarqyn Turlybaıǵa úkim shyǵady. Sot úkimi Aqjarqyn paıdasyna bolady dep úmittenemiz. QR SІM birige otyryp Aqjarqynnyń anasyna vıza jasaý máselesin sheshtik. Mınıstrliktiń arqasynda Aqjarqynnyń anasy 1 jyl boıy Qytaıǵa kedergisiz kirip shyǵa alatyn boldy», - dedi Suńqar Nurmaǵambetov.

Aqjarqynnyń qorǵaýshysy men QR SІM Qytaıdan Qazaqstan azamattaryn qaıtarý týraly halyqaralyq kelisimniń tarmaqtaryn paıdalanbaq.

Aıta ketý kerek, Aqjarqyn Turlybaı 2014 jyldyń naýryzynda Gýanchjoý áýejaıynda ustalǵan bolatyn. Qyzdyń sómkesinen 4,5 keli amfetamın tabylǵan.

Anasynyń aıtýynsha, kıim satyp alýǵa ketken Aqjarqynǵa bireýler esirtki salyp jibergen.

2016 jyldyń 2 qarashasynan bastap QHR Gýandýn provıntsııasynyń soty Aqjarqyn isin qaıta qarap jatyr.