Aqjarqyn Turlybaıdyń sot otyrysy qorytyndysynan advokattar jigerlene tústi
«Sot otyrysy sátti ótti. Qorytyndysy da ózimiz kútkendeı bolyp shyqty. Bul joly biz Pıter esimdi afrıkalyq jigit pen Alena esimdi (nıgerııalyqtyń jubaıy - red.) qyzdyń kináli ekenin aıǵaqtaıtyn faktilerdi keltirdik. Osylaısha, biz Aqjarqynnyń kinásizdigin dáleldeýge nıettimiz. Qazir naǵyz qylmyskerler bostandyqta júr, al olarǵa aldanǵan adam jaýapkershiliktiń bar salmaǵyn kóterýde. Búginge deıin birneshe sot otyrystary ótti, nátıjesin búgin kórip otyrmyz», - dedi qazaqstandyqtyń basty qorǵaýshysy - advokat Fen Chjıtszıan. Ol sottyń ádil sheshim qabyldaryna senimdi ekenin jáne qyzdyń bolashaǵy jarqyn ekenin aıtty.
«Meniń kópjyldyq zańgerlik tájirıbem boıynsha, tez qabyldanǵan sheshimder sottalýshy paıdasyna sheshilmeıdi. Biraq sonda da biz kezekti sot otyrysy men sot sheshiminiń 2017 jyly qańtar aıynda shyǵatynyna úmittenemiz. Bul biz úshin úlken jetistik bolar edi», - dedi Fen Chjıtszıan. QazAqparat tilshisine bergen suhbatynda qyzdyń qazaqstandyq advokaty Suńqar Nurmaǵambetov otyrys týraly qysqasha aıtyp ótti. «Búgin Gýanchjoý sotynda bizdiń otandasymyz Aqjarqyn Turlybaıdy esirtki kontrabandasyna aıyptaý boıynsha sot otyrysy ótti. Odan jaýap alyndy jáne ol qytaı tilinde túsinikteme berdi. Aqjarqyn aıyptaýlarmen kelispeıdi jáne óziniń kinásiz ekenin aıtýda. Sot keńes bólmesine ketti jáne jarııalaý merzimi ashyq kúıinde qaldy. Úkim shyǵarý merzimi jarııalanǵanda, taraptarǵa tıisti túrde habar beriledi», - dedi advokat QazAqparat tilshisine bergen suhbatta. Onyń aıtýynsha, Aqjarqynnyń kóńil-kúıi qanaǵattanarlyq. «Aqjarqyn ekeýmiz sóılestik. Oǵan týystarynyń fotosýretteri men aýdıojazbalaryn kórsetip, qoldaý bildirdik. Óz kezeginde Aqjarqyn oqıǵaǵa beı-jaı qaramaǵan Qazaqstan azamattaryna, QR SІM, qorǵaýshylarǵa alǵys bildirip, qoldaý kórsetýlerin surady», - dep S.Nurmaǵambetov erekshe atap ótti.
QHR-daǵy QR Elshiliginiń konsýldyq bóliminiń jetekshisi Bolat Syrlybaevtyń aıtýynsha, Aqjarqyn Turlybaıdyń jáne ózge de QR azamattarynyń quqyqtary men múddelerin qorǵaý máselesin Qazaqstan Syrtqy ister mınıstrligi men QHR-daǵy QR Elshiligi jiti qadaǵalap otyrady. Ol 2015 jyly qyrkúıek aıynda Qazaqstan Respýblıkasynyń Prezıdenti Nursultan Nazarbaevtyń QHR memlekettik sapary barysynda eki el arasyndaǵy sottalǵan adamdardy berý týraly kelisim boıynsha ratıfıkatsııalanǵan gramota almasý týraly Hattamaǵa qol qoıylǵanyn eske saldy. 2015 jyldyń tamyz aıynan beri QHR-daǵy QR Elshiligi men Qazaqstan quqyq qorǵaý organdarynyń kómegimen Qytaıda sottalǵan 12 qazaqstandyq elge qaıtaryldy. "Aqjarqyndy ekstradıtsııalaý úshin sottyń sheshimi shyǵýy qajet. Onsyz biz Aqjarqyndy elge qaıtara almaımyz. Biz Qytaı soty ádil sheshim shyǵarady dep úmittenemiz», - dedi B.Syrlybaev.
Aqjarqynnyń qytaı tilin jetik meńgergenine aýdarmashy Hýan ıAntıan tań qaldy. «Men Aqjarqynnyń tar qapasta qytaı tilin úırenip, erkin sóılep ketkenine tań qalyp turmyn. Ol meniń qyzmetimnen bas tartyp, sýdıalarmen, prokýrorlarmen, advokattarmen tikeleı sóılesti», - dedi ol QazAqparat tilshisine bergen suhbatta.
Eske sala ketsek, Aqjarqyn Turlybaı sot otyrysy barysynda jylap jiberdi. Tóraǵalyq etýshi sýdıa Aqjarqynǵa jyly shyraı tanytyp, otyrys sońynda «Bári jaqsy bolady!» dep ony shıratyp qoıdy. Jáne QHR-daǵy QR Elshiliginiń konsýldyq bóliminiń jetekshisi Bolat Syrlybaevtyń ótinishimen sýdıa jýrnalısterge Aqjarqynnan suhbat alýǵa, uıaly telefonǵa túsirýge ruqsat berdi. Aqjarqynnyń anasy aýdıohabarlama arqyly qyzyna qoldaý bildirdi.
21 jastaǵy qazaq qyzy Aqjarqyn Turlybaı 2014 jyldyń naýryz aıynda Qytaıdyń Malaızııamen shekarasynda esirtkimen ustalǵan bolatyn. Onyń júk sómkesinen 4,5 keli esirtki tabyldy, Aqjarqyn ol týraly bilmeıtinin málimdegen. Osy is boıynsha Qytaıdyń Gýanchjoý soty Aqjarqyn Turlybaıdy esirtki kontrabandasymen aıyptap, ómir boıyna bas bostandyǵynan aıyrdy. Keıinirek, esirtki quraldarynyń, psıhotroptyq zattardyń jáne olardyń prekýrsorlarynyń zańsyz aınalymyna qarsy kúres jónindegi ortalyqazııalyq aımaqtyq aqparattyq ortalyq qyzdyń nıgerııalyq narkomafııa qurbany bolǵanyn habarlady. 2016 jyly 7 sáýirde apellıatsııalyq satydaǵy sot Aqjarqyn Turlybaıdyń ómir boıyna bas bostandyǵynan aıyrý jazasyn ózgertý jáne isti birinshi satydaǵy sottyń qaraýyna jiberý týraly qaýly etti.
