Aqjarqyn Turlybaıdyń isimen endi Bas prokýratýra aınalysady - SІM

ASTANA.KAZINFORM – Syrtqy ister mınıstrliginiń resmı ókili Aıbek Smadııarov Qytaıda júrip esirtki saýdasy boıynsha kúdikke ilinip, ómir boıyna sottalǵan Aqjarqyn Turlybaıdyń isi qandaı satyda ekenin aıtty.

– Bas prokýratýra jelisi boıynsha jumys júrip jatyr. Biz isteýimiz kerek jumystyń bári isteldi. Ary qaraı Bas prokýratýra jelisi boıynsha aqparat almasý bolady, - dedi ol vedomstvonyń dástúrli baspasóz máslıhatynda.

Aıtýynsha, Qazaqstan dıplomattary jyl saıyn shetelde túrmede otyrǵan Qazaqstan azamattaryna baryp, kezdesip otyrady.

– Bul – bizdiń kúndelikti kúıbeń jumysymyz. Ol baǵytta jumys júrip jatyr. Bıyl dıplomattar Aqjarqyn Turlybaıǵa bardy ma, joq pa, ony qazir naqty aıta almaımyn, - dedi Aıbek Smadııar.

Eske salsaq, byltyr jyl aıaǵynda Bas prokýrordyń orynbasary Ǵalymjan Qoıgeldıev Qytaıda sottalǵan Aqjarqyn Turlybaıdy Qazaqstanǵa qaıtarý kelissózderi jalǵasyp jatqanyn aıtqan edi.