Aqjarqyn Turlybaı isi: Bas prokýratýra Nıgerııa azamatynyń ekstradıtsııasyna qatysty túsinikteme berdi
ASTANA. KAZINFORM – QR Bas prokýrorynyń orynbasary Ǵalymjan Qoıgeldıev Aqjarqyn Turlybaı isi boıynsha qazirgi jaǵdaı men tergeý barysy jóninde aıtty.
Senatta ótken brıfıng barysynda jýrnalıster Qazaqstannyń Interpol arqyly Nıgerııa azamaty Adındo Nonso Fortýneni elge ekstradıtsııalaý týraly ótinish joldaǵanyn eske saldy. Ol Aqjarqyn Turlybaı isi boıynsha kúdikti dep tanylǵan.
– Bul is jáne buǵan deıingi barlyq is, sonyń ishinde Aqjarqynnyń isi de bizdiń turaqty baqylaýymyzda bolady. Atalǵan máseleni nazardan shyǵarmaı, kúdiktini elge qaıtarý úshin bar múmkindikti paıdalanamyz. Mundaı jaǵdaılarda belgili bir tártip bar. Aldymen Interpol izdeýdegi adamnyń ornalasqan jerin anyqtaıdy, sodan keıin ekstradıtsııa tetigi iske qosylady. Qazir biz onyń qaı jerde júrgenin anyqtaý nátıjesin kútip otyrmyz. Ornalasqan jeri belgili bolǵan sátten bastap, birden ekstradıtsııalaý máselesine kirisemiz, - dedi Ǵalymjan Qoıgeldıev.
Eske salsaq, Aqjarqyn Turlybaı 2014 jyldyń naýryz aıynda Qytaıdyń Gýanchjoý qalasyndaǵy áýejaıda ustalǵan bolatyn. Tergeý materıaldaryna sáıkes, onyń sómkesinen 4,5 kılogramm amfetamın tabylǵan. Ol Malaızııaǵa sán kıimderin jetkizýshi kýrer retinde jumys isteýge bara jatqanyn aıtqan.
Buǵan deıin Qytaı soty ómir boıy bas bostandyǵynan aıyrý týraly úkimdi ózgerissiz qaldyrǵan edi.