Aqjar aýdanynda «ashyq ákimdik» jumysy tanystyryldy
PETROPAVL. QazAqparat – Soltústik Qazaqstan oblysyndaǵy Aqjar aýdanynyń ortalyǵy – Talshyqtyń servıstik ákimdiginde qurylys, bilim, kommýnaldyq jáne aýyl sharýashylyǵy, jumyspen qamtý jáne AHAJ bólimderi jumys isteıdi.
Budan bylaı aýdan turǵyndary memlekettik qyzmetshilerdiń kabınetteriniń tabaldyryǵyn tozdyrmaı, qajetti qyzmetterdi bir orynnan alatyn boldy.
Ortalyqtyń ashylýyna aýdan ákimi Erbatyr Madııarov, Sybaılas jemqorlyqqa qarsy kúres qyzmeti departamenti basshysynyń birinshi orynbasary Nurlan Jahın men oblys ákiminiń orynbasary Ǵanı Nyǵymetov, sonymen qatar «Qyzyljar – adaldyq alańy» jobalyq keńsesiniń jetekishsi Amangeldi Satanov qatysty.
«Óńirde memlekettik organdardyń ashyqtyǵy men aıqyndylyǵy qaǵıdattaryna erekshe kóńil bólinedi. Aýdandyq front-ofıs keńes berý, qujattardy qabyldaý jáne halyqqa kómek kórsetý úshin qolaıly alań qurýǵa baǵyttalǵan. Sonymen qatar, «Qyzyljar – adaldyq alańy» jobasy aıasynda dástúrli túrde azamattardyń ashyq qabyldaýlary ótkizilip, turǵyndardyń máseleleri sheshimin tabýda. Oblys ákimdiginiń barlyq keńesteri online rejıminde ótkiziledi. «Ashyq bıýdjetterdiń ınteraktıvti kartasy» arqyly halyq bıýdjet aqshasynyń bólinýin jáne jumsalýyn jiti qadaǵalaýda», - dedi Ǵanı Nyǵymetov.
Servıstik ákimdik ashylǵannan keıin qonaqtar ortalyqty aralap, qyzmetkerlermen áńgimelesti.
«Búgin biz birneshe nysanǵa baryp, sonyń ishinde aýyl ishindegi joldardy jóndeý jumystaryna kýá boldyq, halyqpen júzdesip, atqarylyp jatqan jumystardyń ashyqtyǵyna kóz jetkizdik. Jalpy, oń áser aldyq. Aqjar aýdanynyń ákimi usynǵan «ashyq ákimdik» tujyrymdamaǵa sáıkes keledi. Ashyqtyq jáne eseptilik bar. Bul open space, bos keńistik. Jalpy yńǵaıly jáne kedergisiz jaǵdaılar jasalǵan», - dep Nurlan Jahın oıyn jetkizdi.
Qazirgi ýaqytta Soltústik Qazaqstan oblysynda 2019 jyldan bastap aýdandar men qalalarda 9 servıstik ákimdik ashyldy. Jyl sońyna deıin barlyq aýdan ákimdikteriniń jumysyn «open space» formatyna kóshirý josparlanýda.
