Aqyrzaman bolmaıtyn bolypty
ASTANA. 12 naýryz. QazAqparat - Qanshama jyldan beri «aqyrzaman taıap qaldy» dep, kúlli álemniń úreıin ushyrýmen aınalysyp kelgen atyshýly amerıkandyq din qyzmetkeri Garol Kempıng aqyr-aıaǵy aqyrzamannyń qashan bolatynyn bilmeıtindigin moıyndady.
Ol bul málimdemesin óz ýaǵyzdaryn taratatyn Family Network radıostansasyna bergen suhbatynda jarııa etken. Sonymen qatar, ol endigári «olaı bal ashpaımyn» dep ýáde bergen.
«Biz aqyrzamannyń dál ýaqytyn anyqtaımyz dep, qatty qateleskenimizdi ókine otyryp moıyndaımyz. Biz sol bir kúnáǵa toly tujyrymymyz úshin Qudaıdyń aldynda basymyzdy ıip, keshirim suraımyz», - deıdi ol tyńdarman qaýymǵa.
Málimdemede, sondaı-aq, atalmysh radıonyń aqyrzaman taqyrybyna endigári oralmaıtyndyǵy týraly da aıtylǵan. Kempıng pen onyń jaqtastary: «Biz úlken sabaq aldyq jáne barlyǵy Qudaıdyń qolynda ekenin, aqyrzamannyń naqty merzimin biz emes, tek Ol ǵana biletinin túsindik», - dep aǵynan jarylady.
Buryndary Kempıng únemi aqyrzamannyń taıap qalǵanyn aıtyp, naqty datalarmen «dáleldep», eldiń úreıin ushyryp kelgen bolatyn. Osydan 17 jyl buryn atalmysh din qyzmetkeri aqyrzaman 1994 jyldyń 15 qyrkúıeginde bolady dep málimdegen edi. Sol kúni eshteńe bolmaǵan soń, ol «azdap qatelesip» ketkenin jetkizgen. Kempıngtiń sózine sensek, ol Іnjilde jasyrylǵan sáýegeılik sózderdiń maǵynasyn ashatyn matematıkalyq júıe oılap taýypty. Barlyq «jańalyǵyn» sol júıeniń kómegimen ashady eken.
Alaıda onyń júıesi bir de bir ret durys kóripkeldik jasamaǵan. Kempıng 2011 jyly kelesi boljamymen shyǵyp, sońǵy jyldardaǵy jer silkinisteri Aqyret kúniniń belgileri bolyp tabylady degen málimdeme jasaǵan bolatyn. Tipti, ol kún 21 mamyrda bolady dep naqty aı-kúnin jarııa etken.
21 mamyr kelip, ol da ótken soń, Kempıng «negizinen eki aqyrzaman bolady, biri - rýhanı, ekinshisi - tándik» dep aqtalǵan-dy. Onyń aıtýynsha, 21 mamyr kúni «kúlli álem qorqynyshtan dúr silkindi», sonyń saldarynan «rýhanı óldi». Qudaı osylaısha «óziniń oılaǵan oıyn týra iske asyrdy». Sóıtip, sáýegeı zamanaqyrdyń ekinshi kezeńin belgilep, 21 qazan dep ataǵan.
Onyń sózinshe, bul endi «tándik» zamanaqyr bolady eken. Onymen qoımaı, «men óte kóp oılandym, aqyry «aqyrzaman óte-móte tynysh, eshkimge bildirmeı keledi» degen toqtamǵa keldim degen.
21 qazan da yń-shyńsyz tarıh qoınaýyna engen soń, Kempıng kópke deıin jym-jylas jatyp alypty. Nege deseńiz, aıdyń-kúnniń amanynda abyroıy aırandaı tógilgen din qyzmetkeri qatesin ábden moıyndaǵan soń, ózin qalaı aqtaýdyń joldaryn oılastyrǵan. Kempıngtiń aıtýynsha, ol qansha jerden qatelesse de, onyń ýaǵyzdary arqasynda kóptegen adamdardyń Іnjildi óz betterimen oqyp-bilýge degen qushtarlyqtary artqan kórinedi.
