Aqynnyń syılyǵynan sózi qymbat: Pavlodarda aıtys ótti

PAVLODAR. QazAqparat – Pavlodarda Estaı atyndaǵy mádenıet saraıynda Muzafar Álimbaevtyń 100 jyldyǵyna oraı, «Aqynnyń syılyǵynan sózi qymbat» atty aıtys uıymdastyryldy, dep habarlaıdy QazAqparat Pavlodarnews.kz saıtyna silteme jasap.

Dúbirli dodaǵa 10-nan astam aıtysker qatysty. Júırik aqyndardyń qatarynda jańadan aıtysyp júrgen jas aıtyskerler de boldy. Beksultan Qaıdar, Gúlsheker Bataı, Orazbek Saıahat, Nurqanat Qaırat, Bóken Jiger, Erlan Amanqoja, Nurbek Bákir, Qaırolla Hafız, Qazbek Ibarhım, Alpysbaı Honj, Nursultan Rymbaı jáne Mızan Jumali syndy óńir aıtyskerleri óner kórsetti.

Sonymen, aıtys nátıjesi boıynsha, bas júldeni jáne 500 myń teńgelik sertıfıkatty Nurbek Bákir utyp alsa, birinshi oryndy Qaırolla Hafız ıelenip, 400 myń teńge aldy. Ekinshi oryndy jáne 250 myń teńgelik syıaqyny Nurqanat Qaırat pen Bóken Jiger ıelendi.

Úshinshi orynǵa Orazbek Saıahat pen Nursultan Rymbaı taban tirep, 150 myń teńgelik sertıfıkattyń ıeleri atandy.

Zekebaı Soltanbaıuly atyndaǵy arnaıy júlde Alpysbaı Honjǵa, Arman Qanı atyndaǵy arnaıy júlde Erlan Amanqojaǵa buıyrdy. Arnaıy júlde alǵandarǵa 100 myń teńgelik syıaqy tabystaldy. Sonymen qatar, ár qatysqan aqynǵa 80 myń teńgelik yntalandyrý júldesi berildi.

Aıta ketý kerek, aıtysqa qatysqan eń jas aqyn – Ibrahım Qazbek. Aqynnyń jasy 16-da. Buǵan deıin de birneshe aıtysqa qatysyp, halyqtyń yqylasyna ıe bolyp júr.