Aqyndar men ánshiler qazaq kúresinde baq synaıdy

ASTANA. QazAqparat - ​Elordada Naýryz meıramy qarsańynda qazaq kúresinen «Óner barysy» ótedi. Bul týraly belgili aqyn Balǵynbek Imashev Instagramdaǵy paraqshasynda jazdy, dep habarlaıdy QazAqparat Elorda Infoǵa silteme jasap.

​«Ónerpaz jandardyń arasynda salt-dástúrin qaımaq, dini men tilin baıraq, ary men namysyn qaıraq etip júrgen naǵyz ultjandy azamattar jeterlik. Olardyń tek nasıhaty kem bolyp turǵan sekildi. Osy olqylyqtyń ornyn toltyrý maqsatynda jańa jobany josparladyq», - dep jazdy Balǵynbek Imashev.

Jobanyń maqsaty - qazaq kúresin damytý, óner men sporttyń egiz ekenin kórsetý.

«Óner barysy» jobasynda tanymal ánshiler, aqyndar, akterlar, jaıdarmanshylar men jýrnalıster t.b. óner ıeleri qazaq kúresinen baq synaıtyn bolady. Olardyń barlyǵy elge belgili óner áleminiń ókilderi bolmaq.

Al ónerpazdarǵa Qazaqstan barysy atanǵan balýandar bapkerlik jasaıtyn bolady.