Aqyndar asqaq jyryn oqyp berdi
ASTANA. Qazannyń 19-y. QazAqparat - Keshe, qazannyń 18-i kúni Astanadaǵy «Turan» meıramhanasynda «Ónerpaz bolsań arqalan...» atty ádebı-óner keshi bolyp ótti.
Bul sharany Astana qalasynyń Tilderdi damytý basqarmasy uıymdastyrdy. Osy keshke Memlekettik syılyqtyń ıegeri, aqyn Farıza Ońǵarsynova men «Juldyz» jýrnalynyń bas redaktory, aqyn Ulyqbek Esdáýlet qatysyp, jastarǵa júrekjardy tilegin jetkizdi.
«Bir adamnyń keshi emes, sońymyzdan erip kele jatqan súıikti jas daryn ıeleri, sińlilerimiz ben inilerimizdi jınap, óleńderin oqytyp, ánderin tyńdap, bir jasap qaldyq. Osy iske bastamashy bolǵan Astana qalasynyń Tilderdi damytý basqarmasyna, onyń basshysy Orazgúl Asanǵazyǵa raqmet. Kezdesýdiń jańa bir túrin oılap tapqan ekensizder. Bul jerge jastardyń tamaq jeýge emes, jyrmen sýsyndaýǵa jınalyp otyrǵany qýantady»,- dedi aqyn Farıza Ońǵarsynova.
Óz kezeginde Ulyqbek Esdáýlet astanalyq oqyrmandardyń suraýy boıynsha birneshe óleńin oqyp berdi.
Aıta ketý kerek, «Turan» meıramhanasyna jyrsúıer qaýym óte kóp jınaldy. Ásirese, kolledjder men orta mektepterdiń oqýshylary, joǵary oqý ornynyń stýdentteri qatysyp, júrgizýshiniń poezııa álemine qatysty suraqtaryna belsendi jaýap berip otyrdy.
Elimizdiń birqatar óńirinen kelgen jáne astanalyq jas aqyndar óleńderin oqyp, kórermenderdiń qoshemetine bólendi jáne óleń ólkesinde júrgen aǵa urpaqtyń joǵary baǵasyna ıe boldy. Atap aıtqanda, Yqylas Ojaı, Qalqaman Sarın, Baýyrjan Qaraǵyz, Ularbek Dáleı jáne basqa jas daryn ıeleri óleńderin jatqa oqydy.
Jınalǵandar úntaspaǵa jazylyp alynǵan Muqaǵalı Maqataevtyń óz daýsymen oqyǵan óleńin tyńdady.
Osy keshte aqyn Roza Álqoja óleń oqyp, án shyrqady. Al dombyrashy Murager Saýranbaev Nurǵısa Tilendıevtiń kúılerin tartyp, keshtiń shyraıyn ashty.
