Aqyndar adaldyq pen patrıotızmdi jyrlady - Kókshetaý

KÓKShETAÝ. QazAqparat - Kókshetaýda Qazaqstan Respýblıkasy Táýelsizdiginiń 28 jyldyǵyna arnalǵan «Táýelsiz elimdi jyrlaımyn» atty aqyndar músháırasy ótti, dep habarlaıdy QazAqparat tilshisi oblystyq ishki saıasat basqarmasyna silteme jasap.

Elbasynyń «Bolashaqqa baǵdar: rýhanı jańǵyrý» baǵdarlamalyq maqalasyn júzege asyrý, sondaı-aq «Aqmola – adaldyq alańy» jobasy sheńberinde Kókshetaý qalasynyń mádenıet jáne tilderdi damytý bólimi uıymdastyrǵan músháıranyń maqsaty - jas urpaqqa patrıottyq tárbıe berý, parasattylyq, adaldyq qaǵıdalaryn qalyptastyrý, ulttyq rýhanı murany nasıhattaý.

Baıqaýǵa 16-29 jas aralyǵyndaǵy 26 talantty aqyndar men oryndaýshylar qatysty. Jas aqyndar Petropavl, Semeı, Nur-Sultan, Stepnogorsk jáne Kókshetaý qalalaryn tanystyrdy.

Qazylar alqasynyń quramynda Qazaqstan Jazýshylar odaǵynyń múshesi, Qazaqstan Jýrnalıster odaǵynyń Aqmola oblystyq fılıalynyń tóraǵasy Serik Jetpisqalıev, Sh.Ýálıhanov atyndaǵy Kókshetaý memlekettik ýnıversıtetiniń oqytýshysy fılıologııa ǵylymdarynyń kandıdaty, dotsent Sábıt Jámbek, aqyn Qýanysh Ospan, Aqmola óńirlik «Rýhanı jańǵyrý» jobalyq keńsesiniń jetekshisi Qaırat Seıtqazın, Sh.Ýálıhanov atyndaǵy memlekettik ýnıversıteti tarıh pániniń oqytýshysy Talapker Ýálıev boldy.

Іs-sharaǵa Aqmola oblysy boıynsha sybaılas jemqorlyqqa qarsy is-qımyl departamenti basshysynyń birinshi orynbasary Arman Berdalın qatysyp, aqyndar qoǵamnyń sybaılas jemqorlyqqa qarsy mádenıetin qalyptastyrýda mańyzdy ról atqaratynyn atap ótti.

Belgili bolǵandaı, sybaılas jemqorlyq qazirgi zamannyń ótkir máseleleriniń biri bolyp tabylady, sondyqtan adaldyq, adamgershilik, satylmaýshylyq sııaqty qundylyqtardy nasıhattaý arqyly aqyndar joǵary mádenıetti jáne patrıottyq sana sezimdegi óskeleń urpaqty qalyptastyrýǵa erekshe úles qosady.

Baıqaý qorytyndysy boıynsha Bas júldeni M. Jumabaev atyndaǵy Aqmola oblystyq ámbebap-ǵylymı kitaphanasynyń qyzmetkeri Oralbek Núrish jeńip aldy. Birinshi oryndy Ortalyq Qazaqstan Akademııasynyń stýdenti Asemgúl Serikbol, ekinshi oryndy - Nur-Sultan qalasynan Abylaı Máýlen men Petropavl qalasynan Abylaıhan Áshimhan jáne úshinshi oryndy Semeı qalasynan Elaman Ospan jáne Kóken Shákeıuly atyndaǵy aqyndar mektebiniń shákirti Uǵylan Qarashash ıelendi.

Jeńimpazdar alǵys hat jáne estelik syılyqpen marapattaldy.