Aqyn, jýrnalıst Saılaý Baıbosynnyń «Ereımentaý» atty kitabynyń tanystyrylymy boldy

Atalǵan basylymnyń serııasymen birneshe kitaptyń jaryq kórgenin atap ótken QR Memlekettik syılyǵynyń ıegeri, professor Qoıshyǵara Salǵara «bul basylymnyń árbir qazaqtyń tarıhı jerlerin, ásirese tarıhı tulǵalar shyqqan jerlerin búgingi jaǵdaıymen ótken tarıhyn ózektestire, sabaqtastyra, jalǵastyra otyryp shyǵarýy óte oryndy», dedi.

Ereımen óńiri qıly-qıly tarıhymen, qarys súıem jeri úshin qaharmandyqpen kúresken qanjyǵaly Bógenbaı, Jantaı, Bozan batyrlardyń, Bógenbaıdan taraıtyn Bapan, Saqqulaq bıler, sondaı-aq Úmbeteı jyraý sııaqty halqyna qorǵan bolǵan uly tulǵalar dúnıege kelgen meken. Keń-baıtaq qazaq dalasynyń qasıetti bir pushpaǵy sanalatyn osynaý óńirdiń arǵy-bergi tarıhy hattalyp, el aýyzynda aıtylatyn ańyz-áńgimeler saralanǵan, aıtýly oqıǵalar men shejirelik jylnamalar júıelengen, tarıhı tanymal tulǵalar jaıynda syr shertetin kitaptyń oqyrmanǵa bereri az emes.

«Folıant» baspasynyń «Meniń Otanym - Qazaqstan» serııasymen jaryq kórgen kitaptyń tusaýkeser rásimine aqyn- jazýshylar, mádenıet jáne óner qaıratkerleri, zııaly qaýym ókilderi qatysty.

QR Mádenıet jáne aqparat mınıstrligi men QR Ulttyq akademııalyq kitaphanasynyń qoldaýymen ótken shara barysynda «Folıant» baspasy kitaptarynyń kórmesi uıymdastyryldy. Kórmege ártúrli oqýlyqtar, sózdikter, kórkem shyǵarmalar qoıylǵan.